Berisha akuza Ramës: Pazare me Vuçiç në dëm të Kosovës

Kreu demokrat Sali Berisha ka akuzuar Kryeministrin Edi Rama se po bën pazare me Presidentin serb Aleksandar Vuçiç në dëm të Kosovës.

Berisha tha se Edi Rama ishte I pari që vendosi sanksione ndaj Kosovës, ndërkohë që një veprim të tillë nuk e ndërmorri asnjë prej qeverive të Rajonit.
Në një intervistë për “RTK Prime”, Berisha tha se Edi Rama ndërhyri në mënyrë të turpshme kundër Kosovës.

“I pari që vendosi sanksione Kosovës ishte Edi Rama në mënyrën më të turpshme.

Pse nuk e bëri një qeveri tjetër rajonale përveç Ramës këtë për shembull nuk e bëri Mali i Zi, ose Maqedonia e Veriut, Kroacia e tjera, por pikërisht Edi Rama. Çfarë mund të bëjë një fqinjë më keq se sa kjo që bëri Edi Rama me Kosovën”, tha Berisha.

Lidhur me draftin që Edi Rama tha se kishte propozuar si një zgjidhje mes Prishtinës dhe Beogradit, Berisha tha se ai e bëri këtë për shkak të pazareve me Vuçiç.

“Absolutisht ai deklaroi se është drafti i tij, po ai e deklaroi me porosi që ti jap mundësi Vuçiçit që ai ta kundërshtojë.

Ai thotë është drafti i Tiranës, dhe unë nuk e pranoj, për të lehtësuar pozitën, sepse përhirë të së vërtetës në takimin e fundit, siç pohoi vet Vuciç, Kurti doli i fituar, por përkohësisht sepse Albin Kurti pranoi ato materiale që ja ofruan udhëheqja e lartë politike evropiane, ai tha unë këtë po e pranoj mos ma ndryshoni më, jam dakord dhe po shkoje në Kosovë”, u shpreh Berisha.