Përplasjet Berisha-Basha, Rama: Në mes janë afera të thella, janë 2 copa e 7 çika

Kryeministri Edi Rama tha mbrëmjen e sotme në Opinion se nuk i ka ndjekur fare zhvillimet në Kuvend.

Rama tha se është njohur nga mediat mbi situatën që ka ndodhur sot në Kuvend, ku deputetë të opozitës kanë bllokuar Parlamentin dhe nuk kanë lejuar mazhorancën që të zhvillojnë seancën.

“Kuvendin e menaxhon Kryetarja e Kuvendit, është edhe ministrja e Marrëdhënieve me Kuvendin, dhe besoj se ato kanë bërë gjënë e duhur”, tha Rama.

I pyetur nëse PS do t’ia japë shumicës së PD-së, shumicës së Grupit Parlamentar, bashkëkryetarin e Komisionit të Reformës Zgjedhore, Rama tha se këto zhvillime në PD janë një botë tjetër, që nuk ka lidhje me atë Botën që unë njoh në Shqipëri.

“Këta deputetë nuk përfaqësojnë ato mijëra njerëz që kanë votuar për opozitën. Unë nuk e di se kush është sot Partia Demokratike, pasi politikisht janë më shumë se dy copa dhe më shumë se 7 cika”, tha Rama.

Kryeministri u shpreh se nuk është ai që vlerëson apo injoron se kush është shumica, kush përfaqëson shumicën në PD.

“Unë përfaqësoj shqiptarët si Kryeministër, e vetmja gjë që nuk përfaqësoj votuesit e opozitës, është salla e Kuvendit. Këtë nuk e zgjidh dot unë, janë ato që kanë mandatuar si deputetë që duhet ti përfaqësojnë”, tha Rama.

Ai tha se Sali Berisha përfaqëson Botën tjetër dhe s’ka lidhje fare me Botën që përfaqësojmë ne. “Problemi me opozitën nuk është se çfarë bëjmë ne, se çfarë bëjnë njerëzit. Problemi është se ajo shumatorja e ndarë në copa e cika janë pjesë e një çorbe interesash të konfliktuara”, tha Rama.

Ai tha se opozita është e përçarë për shkak të aferave të thella, dikur të përbashkëta.

“Opozita vijon në monopatet e tyre, ne kemi rrugën tonë. Nuk kemi nevojë fare as ti përçajmë ne, as të bëjmë koalicione as me Botën tjetër as me Lulzim Bashën”, tha Rama, duke theksuar se të dy i përkasin një Bote që s’ka lidhje me atë që flet ai.