Në Ditën e Shenjtërimit të Nënë Terezës, kreu i Partisë Demokratike, Sali Berisha, përveçse nderoi figurën e saj, zhvilloi një konferencë të fortë për shtyp, duke akuzuar drejtpërdrejt kryeministrin Edi Rama për përfshirje në një “organizatë kriminale të tmerrshme” në bashkëpunim me ish-agjentin e FBI-së, Charles McGonigal.
Berisha akuzoi se mediat kryesore në Shqipëri po censurojnë raportin e Inspektorit të Përgjithshëm të Departamentit të Drejtësisë së SHBA. Ai tha se ky raport dokumenton:
- Takime të Ramës me McGonigal në Tiranë dhe Nju Jork.
- Pagesa kundër opozitës.
- Ndërhyrje në licencat e naftës dhe hetime private në Vjenë.
Sipas Berishës, këto veprime përbëjnë krim të rëndë sipas ligjeve shqiptare, amerikane dhe ndërkombëtare.
Lideri i opozitës zgjeroi akuzat edhe te kreu i SPAK Altin Dumani, të cilin e quajti “mburojë e Ramës” pasi, sipas Berishës, ka mbajtur në sirtar dosjen e McGonigal. Ai përmendi edhe Dorian Duçkën si promotor të lidhjeve me kompaninë kineze CEFC dhe udhëtimet e Ramës me avionë privatë të kësaj kompanie. Berisha shtoi se McGonigal kishte lidhje të ngushta me Duçkën dhe se të dhënat e hetimeve shkonin drejt drejtuesve të CEFC.
Ai përmendi edhe “Targetin 3”, një shtetas i huaj i dyshuar për përfshirje në tregtinë e armëve dhe i lidhur me Ramën. Berisha solli në vëmendje një rast të publikuar nga mediat franceze, ku një valixhe diplomatike me 20 milionë euro u sekuestrua në aeroportin e Parisit, e dërguar drejt Shqipërisë.
Berisha akuzoi McGonigal se kishte interes të drejtpërdrejtë në reformën në drejtësi dhe vetingun, duke paguar individë për të kaluar procesin. Ai përmendi gjithashtu agjentin e shërbimeve sekrete ruse, Sergei Shestakov, si një nga personat me të cilët McGonigal kishte kontakte për të siguruar akses në qeverinë shqiptare.
Në fund të konferencës, Berisha ftoi FBI-në dhe Departamentin e Drejtësisë të SHBA-së që të vazhdojnë hetimet, duke siguruar se PD do të kontribuojë me dëshmitarë e prova.
Në lidhje me procesin zgjedhor, ai theksoi se dokumentimi i shkeljeve të rënda është detyrimi absolut i PD-së, duke theksuar se 99.9% e vendimeve të dhëna nga institucionet janë kundër opozitës. Berisha deklaroi se hetimi ndaj Ramës në SHBA vazhdon, pavarësisht përpjekjeve të Dumanit për ta fshehur.
Discussion about this post