Ish-Kryeministri Sali Berisha publikoi sot dokumentin e ndryshimit të akuzës për pjesëtarë të fisit Rraja që dhunuan dy kushërinj nga fisi Maja, ngjarje që tronditi opinion publik dhe që u pasua me shkarkimin e Bledi Çucit si ministër i Brendshëm dhe shkrirjen e komisariatit të Krujës.
Akuza e re të Prokurorisë së Tiranës ndaj personave të përfshirë në aktet e dhunës klasifikohet si “plagosje e lehtë me dashje”.
Berisha shkruan se ‘Prokuroria Felaj’, dhunën e ushtruar nga fisi Rraja e konsideron plagosje të lehtë dhe jo krim. Ai e ka quajtur vendimin si skandal dhe krim.
“Skandal!
Për Prokurorinë Felaj thyerja e kockave të kafkës dhe ulnës së parakrahut të qytetarit nga banditët e klanit të partisë mafioze Rraja, është plagosje e lehtë!
E rëndë jo e jo, po as e mesme! Skandal! Krim, “Felo-Prokurori”!
Këtu më poshtë gjeni dokumentin e sotëm të “Felo-Prokurorisë” së Tiranës!”, shkruan Berisha.
Prokuroria ka reaguar zyrtarisht për ngjarjen e ndodhur më 6 korrik të këtij viti në Krujë ku anëtarët e fisit Rraja dhunuan në mënyrë brutale Bilibil dhe Jashar Majën.
Mbi këta persona fillimisht ka rënduar akuza e “plagosjes së rëndë me dashje” në bashkëpunim.
Në reagimin e prokurorisë sqarohet se si janë gjetur plagë në lëkurën e kokës së Jashar Majës dhe shembje të indeve të buta të kokës dhe trupit, shkaktuar me mjete të forta.
Si pasojë personi në fjalë ka humbur aftësinë për punë, për 9 ditë.
Ndërkohë Bilbil Majës i kanë thyer kockat si dhe i kanë shkaktuar plagë në kokë e trup. Edhe ai ka humbur aftësinë për punë për të paktën 9 ditë. Në të dyja rastet, siç thotë prokuroria, nuk është rrezikuar jeta e dy personave.
“Mbështetur në kriterin mjekësor, të parashikuar në ligj, dëmtimet shtetasve J.M. dhe B. M., e klasifikojnë veprën penale të kryer ndaj tyre si, “Plagosje e lehtë me dashje”, parashikuar nga neni 89 i K. Penal”, sqaron prokuroria.
Mbi anëtarët e fisit Rraja që kanë pasur në duar dhe armë rëndon edhe akuza e kanosjes.
Nga ana e prokurorisë, po vijon kryerja e veprimeve të tjera procedurale në lidhje me procedimin penal në ngarkim të këtyre shtetasve.
Discussion about this post