Berisha: “Kryearkitekti” i triumfit të Trump do drejtojë fushatën tonë

Kryetari i Partisë Demokratike, Sali Berisha ka njoftuar ditën e sotme në një konferencë për media se Chris LaCivita, kryearkitekti i fushatës së triumfit të Donald Trump, do të drejtojë fushatën e Partisë Demokratike për zgjedhjet e 11 majit në Shqipëri.

Berisha ka theksuar arritjet e LaCivita në fushatën e Trump, duke përmendur sfidat e mëdha me propaganda, manipulim dhe censurë mediatike, por gjithashtu edhe fitoren spektakolare që arriti Trump.

Kryedemokrati shprehu nderimin dhe kënaqësinë që LaCivita është pjesë e ekipit që do të udhëheqë fushatën për fitoren e PD-së në zgjedhjet e ardhshme.

Lideri opozitar theksoi lidhjen mes PD-së dhe vlerave konservatore, duke përshkruar bashkëpunimin e Chris LaCivita me PD-në si një zgjedhje të natyrshme për shkak të mbrojtjes së këtyre vlerave.

Berisha tha se, pavarësisht presioneve të jashtëzakonshme nga e majta radikale dhe ndikimeve të Xhorxh Sorosit, PD dhe opozita shqiptare qëndruan të pamposhtura në mbrojtjen e parimeve konservatore dhe pluralizmit politik.

Berisha ka akuzuar regjimin e tanishëm të Edi Ramës, duke për përdorimin e drejtësisë si një armë për të shuar opozitën dhe për të mundësuar instalimin e një regjimi të bazuar në korrupsion dhe krim. Kryedemokrati tha se, përkundër këtyre presioneve, PD dhe opozita kanë mbështetur Partinë Republikane në fushatën e fundit të Trump, duke e konsideruar atë një fitore të rëndësishme jo vetëm për SHBA, por edhe për botën.

Kryetari i PD gjithashtu tha se PD mbështet vlerat konservatore të shpallura nga Chris LaCivita dhe është optimist për programin që do të shpëtojë Shqipërinë, duke përmendur fitoren e Trump si një mrekulli që ka ndikim global.

Berisha shtoi se ky është vetëm fillimi i një fushate që do të kthejë Shqipërinë në një rrugë më të ndritur, të mbështetur në shpresë, të ardhme, ligj dhe zhvillim.

Chris LaCivita, i cili tani do të drejtojë fushatën e Partisë Demokratike për zgjedhjet e 11 majit, ka deklaruar se, Sali Berisha është një mik i vërtetë i Amerikës.

Gjatë konferencës së përbashkët me kryetarin e PD-së, Chris LaCivita deklaroi se, Berisha do të zgjidhet kryeministër, ndërsa sulmoi Edi Ramën si kukull në duart e Xhorxh Sorosit.