Ndonëse KQZ përjashtoi grupin e Berishës nga koalicioni “Shtëpia e Lirisë” për zgjedhjet e 6 marsit, kjo se ka penguar ish-kryeministrin të ndezë motorët e fushatës. Këtë të diel, Berisha ndodhet në Sukth ku po prezantohet kandidati për kryetar të Bashkisë Durrës, Ardian Muka.
Gjatë fjalës së tij, ish-kryeministri u shpreh se ambiciet e qeverisë, që sipas tij është shndërruar në një qytet betoni, tejkaluan çdo parashikim. Berisha përmendi portin e Durrësit, me projektin e të cilit sipas tij kryeministri Rama dhe kryedemokrati Basha për interesat e tyre, kërcënuan kafshatën e 12 mijë familjeve.
“Një qeverisje që së bashku me qeverinë vendore e shndërroi Durrësin në kryeqytetin e betonit të Shqipërisë. Në një qytet, që në njërën anë ke banorët e tij më të civilizuar, në anën tjetër ke bandat e qeverisë që punojnë kundër qytetarëve dhe për llogari të qeverisë. Ambiciet e qeverisë për Durrësin tejkaluan çdo parashikim. Porti dhe qyteti janë si trupi me zemrën të lidhur me njëri-tjetrin, kurse kjo qeveri, në mënyrën më të papërgjegjshme, në një nga aferat më të mëdha korruptive në Evropë, duke kërcënuar kafshatën e 12 mijë familjeve, për ta shndërruar 800 mijë metra katrorë, në një zonë ndërtimesh. U tha për Omarin, po tani del për Edvinin dhe Lul Bravën, për larjen e parave të drogës”, tha Berisha.
Për Bashkinë Durrës, Muka do të garojë me kandidatin e PD-së Luan Hoti dhe kandidaten e PS-së, Emirjana Sako, aktualisht kryetare në detyrë.
Discussion about this post