Berisha: Rama antishqiptar, bashkëpunon me Putinin e Ballkanit

Lideri i PD-së Sali Berisha në mbledhjen e Këshillit Kombëtar të Partisë Demokratike tha se Edi Rama është antishqiptar.

Berisha theksoi se Rama është ai që bashkëpunon me Vuçiç, të cilin e ka cilësuar si Putin e Ballkanit.

Berisha në Këshillin Kombëtar të PD: Kjo mbledhje e Këshillit Kombëtar bëhet në një moment jashtëzakonisht kritik për shoqërinë dhe kombin shqiptar. Siç ndiqni situatën, Edi Rama çdo javë e çdo muaj zhytet gjithnjë e më thellë në vasalitet të plotë ndaj presidentit serbo-madh dhe Beogradit.

Nëse ju merrni diskursin e tij, në të gjitha fjalimet e tij do të gjeni Vuçiç, Putinin e Ballkanit. E vërteta është se prapa mbrojtjes që Rama i bën aksit Moskë-Beograd qëndron vasaliteti i tij indirekt ndaj Moskës dhe shkelmimi i interesave të shqiptarëve. Në mënyrë anti-shqiptare dhe ç’njerëzore thotë se nuk bie dakord me Kurtin për qëndrimin ndaj të shkuarës, nuk bie dakord për mosnjohjen e Kosovës.

Kërkesën që ai drejton publikisht ndaj Vuçiç për njohjen e Kosovës e ka të miratuar nga padroni i tij, dhe presidenti serb këtë kërkesë e shumëzon me 0, kështu me këtë alibi ai mbulon të gjitha shërbimet dhe avokatitë që Rama i bën.