Beteja për “iPhone-in” e sekuestruar, Kryemadhi humb dhe në GJL

Gjykata e Lartë ka refuzuar kërkesën e Monika Kryemadhit për kthimin e një aparati celular të sekuestruar me urdhër të SPAK.

Aparati celular i llojit “iPhone” i është sekuestruar një personi të afërt të Kryemadhit, ndërsa dyshohet nga SPAK se përdorej prej saj.

Një kolegj penal i përbërë nga gjyqtarët Ilir Panda, Albana Boksi dhe Medi Bici vendosi në Dhomë Këshillimi të mos pranojë rekursin e bërë nga Kryemadhi, duke lënë kështu në fuqi vendimin e Apelit të Posaçëm të 4 janarit 2024, që nuk liroi nga sekuestroja telefonin.

SPAK është duke hetuar në një dosje të vetme dy kallëzime të bëra ndaj bashkëshortëve Meta-Kryemadhi.

I pari është kallëzimi i ish-deputeti Halit Valteri, i cili ka pretenduar “korrupsion” e “fshehje pasurie”. Kallëzimi tjetër është bërë nga avokati Idajet Beqiri, i cili pretendon se bashkëshortët kanë kryer shpenzime të pajustifikuara në burime të ligjshme për shërbime estetike.

Më herët, Kryemadhi ka deklaruar se hetimet ndaj saj po kryen si një formë hakmarrje për shkak të kallëzimeve që ajo ka bërë në SPAK për inceneratorët. “Nëse denoncimet e mia nuk do të ishin kaq të egra dhe të drejtpërdrejta, nuk do të ishim në hetim pasuror dhe nuk më shqetëson pasi unë nuk kam asgjë për të fshehur. Dihet se çfarë shtëpia ka Monika. Në shtëpinë e Kryemadhit kanë hyrë të gjithë politikanët”, është shprehur ajo në një emision televiziv.

Të njëjtin qëndrim ka mbajtur dhe bashkëshorti i saj Ilir Meta, njëkohësisht kryetar i Partisë së Lirisë.