Biden fajëson Trump për “tërheqjen kaotike” të SHBA nga Afganistani

Shtëpia e Bardhë publikoi të enjten raportin e saj për tërheqjen e SHBA nga Afganistani në vitin 2021.

Edhe pse kjo ngjarje është cilësuar si një nga dështimet më të mëdha të presidentit Joe Biden, raporti ka gjetur një tjetër fajtor.

Sipas Fox News, në raportin me 12 faqe, administrata e Biden mbron vendimin e presidentit për tërheqjen, duke thënë se vendimi për t’i dhënë fund luftës pas dy dekadash ishte gjëja e duhur për t’u bërë.

Por raporti nuk duket se pranon ndonjë gabim të bërë nga Biden.

Megjithatë, dokumenti kritikon vazhdimisht administratën e Donald Trump për kufizimin e kushteve për evakuimin e amerikanëve. Gjatë këtij evakuimi, 13 ushtarë amerikanë humbën jetën pas një sulmi vetëvrasës, teksa mbronin aeroportin e Kabulit.

“Zgjedhja e presidentit Biden për mënyrën se si do të ekzekutohej plani i tërheqjes nga Afganistani u kufizua rëndë nga kushtet e krijuara nga paraardhësi i tij,” thuhet në dokument.

Shtëpia e Bardhë akuzon Trump se ka inkurajuar talebanët, duke u angazhuar me ta në bisedimet e paqes pa u konsultuar më parë me aleatët dhe partnerët e SHBA në rajon.

Dokumenti thekson po ashtu se në të njëjtën kohë, Trump po zvogëlonte praninë ushtarake të SHBA në Afganistan me një sërë tërheqjesh përgjatë vitit 2020.

“Gjatë tranzicionit nga administrata e Trump në administratën e Biden, administrata në largim nuk dha plane se si të kryhej tërheqja përfundimtare ose evakuimi i amerikanëve dhe aleatëve afganë”, thotë Shtëpia e Bardhë.

“Në të vërtetë, nuk kishte plane të tilla kur presidenti Biden erdhi në detyrë, edhe më tërheqjen e plotë të dakordësuar pak më shumë se tre muaj më larg”.

“Në kohën kur Biden mori detyrën, talebanët ishin në pozicionin më të fortë ushtarak që kishin qenë që nga viti 2001, duke kontrolluar ose kontestuar thuajse gjysmën e vendit”

Tërheqja e SHBA nga Afganistani përshpejtoi kolapsin katastrofik të ushtrisë afgane dhe marrjen nën kontroll të Kabulit nga alibanët. Gati 1 mijë qytetarë amerikanë u lanë pas gjatë evakuimit. Mijëra aleatë afganë mbetën në vend.