Shteti serb ka marrë një sërë masash të rrepta sigurie me rastin e vizitës së kancelares Angela Merkel në vend. Sipas “Blic”, kancelarja Merkel do të përshëndetet në hapësirën ajrore të vendit nga ushtria e 29 -të serbe. Ndërkohë që do të ketë dy helikopterë policie në terren gjatë vizitës.
Më shumë se 600 efektivë policie do të vendosën në rrugët që ajo do të kalojë dhe do të jenë drejtpërdrejt përgjegjës për sigurinë e kancelares gjermane. Po ashtu disa ekipe zjarrfikësish dhe ambulanca do të jenë në detyrë gjatë gjithë kohës.
Ndërkohë që vijojnë edhe përgatitjet e tjera për ardhjen e Angela Merkel, nisur nga vendosja e flamujve para Pallatit të Serbisë, si dhe në Kullën Genex në Beogradin e Ri, ku do të kalojë delegacioni.
Angela Merkel do të zbarkojë në aeroportin “Nikola Tesla” në orë 16:00 të mbasdites për të zhvilluar turin e saj të fundit në Ballkan. Ajo do të pritet nga presidenti Alexandër Vucic, ku më pas të dy do të dalin në një deklaratë për mediat.
Pas përfundimit të takimeve në Serbi, Merkel do të niset për në Shqipëri, ku edhe do të zhvillojë takime me zyrtarë shqiptarë, ndërsa gjithashtu do të dalë në një konferencë me kryeministrin Edi Rama.
