Bota rrezikohet nga variantet e reja, dallimet mes Delta dhe Omicron

Varianti i ri Omicron, i cili ka shkaktuar një alarm global, është më ngjitës se Delta. Madje studiuesit kanë shprehur shqetësimin për shfaqjen e mutacioneve të reja.

Viruset po pësojnë vazhdimisht ndryshime në materialin e tyre gjenetik. Këto mutacione mund të çojnë në shfaqjen e varianteve të reja të virusit. Disa variante zhduken ndërsa të tjerët vazhdojnë të përhapen në varësi të avantazhit të mbijetesës ndaj llojeve të tjera të virusit.

Mbikëqyrja epidemiologjike e mutacioneve të reja është një proces i vazhdueshëm dhe i mundimshëm që po zhvillohet në mbarë botën dhe kërkon bashkëpunim ndërkombëtar. Marrja e masave paraprake për të reduktuar  përhapjen e variantit, duke përfshirë vaksinimin kundër COVID-19, është mënyra më e mirë për të ndaluar shfaqjen e mutacioneve  të reja. Testet rutinë diagnostikuese nuk identifikojnë variantin e  SARS-CoV-2, por vetëm praninë e tij.

Prandaj nevojitet një teknologji më specifike e sekuencës së gjenomit për të identifikuar variantet. Vaksinat reduktojnë rrezikun e sëmundjeve të rënda, shtrimit në spital dhe vdekjes nga COVID-19. Dozat përforcuese të vaksinës rekomandohen për të gjithë të rriturit mbi 18 vjeç. Ne nuk e dimë ende efektivitetin e saktë të vaksinave kundër varianteve të reja si Omicron.

Deri më sot, të gjitha variantet e SARS-CoV-2 shkaktojnë të njëjtat simptoma klinike të COVID-19. Disa lloje, të tilla si Alfa dhe Delta, mund të shkaktojnë simptoma më të rënda dhe një rrezik më të lartë të vdekjes.

Varianti i ri SARS-CoV-2 Omicron ka rritur shqetësimet në lidhje me transmetimin dhe potencialin mbizotërues mbi Delta. Mbajtja e një maske është një mënyrë efektive për të reduktuar transmetimin e varianteve. Personat që nuk janë vaksinuar duhet të jenë më të kujdesshëm  dhe të mbajnë maskë edhe në ambientet e brendshme. Përdorimi i maskës  është veçanërisht i rëndësishëm nëse një person jeton me njerëz që kanë një sistem imunitar të dobët, vuajnë nga sëmundje të tjera, janë të moshuar ose nuk janë plotësisht të vaksinuar, shkruan abcnews.al

Omicron

Origjina: Afrika e Jugut

Transmetueshmëria: Mund të përhapet më lehtë në krahasim me variantet e  tjera të virusit, përfshirë Delta.

Rreziqet: Për shkak të numrit të vogël të rasteve deri më sot, ashpërsia e sëmundjes dhe vdekja e lidhur me këtë variant është e paqartë.

Vaksina: Ende nuk ka informacione por vaksinat deri më tani janë efektive në parandalimin e sëmundjeve të rënda, shtrimit në spital dhe vdekjes. Të gjitha vaksinat e miratuara nga FDA pritet të jenë efektive, por ne nuk e dimë shkallën e mbrojtjes në krahasim me variantet e vjetra të virusit. Omicron nënvizon edhe më shumë rëndësinë e vaksinimit dhe dozave përforcuese.

Trajtimet: Disa terapi me antitrupa monoklonale ka gjasa të mos jetë efektive kundër Omicron.

Delta

Origjina: Indi

Transmetueshmëria: Transmetohet më lehtë se variantet e mëparshme të virusit.

Rreziqet: Mund të shkaktojë sëmundje më serioze se variantet e tjera.

Vaksina:  Deri më tani vaksinat janë efektive në parandalimin e sëmundjeve të rënda, shtrimit në spital dhe vdekjes. Të gjitha vaksinat e miratuara nga FDA janë efektive kundër  Delta.

Trajtimet: Pothuajse të gjitha variantet e identifikuara në Shtetet e Bashkuara (përveç ndoshta Omicron) i përgjigjen trajtimit me antitrupa monoklonal të miratuar nga Administrata e Ushqimit dhe Barnave e SHBA (FDA).