Braçe thumbon Ballën e Ballukun: Shyqyr që nuk është sezon karrotash në Divjakë

Erion Braçes duket se nuk i del inati me Belinda Ballukun, e cila e dëboi nga zona e Divjakës për zgjedhjet e 11 Majit, i cili u transferua në Tiranë

Gjatë një bisede me nota humori, Braçe, i ftuar në emisionin “Papare Najt” të Agron Llakajt ka thumbuar jo vetëm Ballukun, por edhe ish-drejtuesin e PS-së në Fier, Taulant Ballën.

Braçe tha se e humbi dëshirën për t’u bërë “bujk” që në momentin që pa Ballën duke shkulur karrota, teksa shtoi se shyqyr që nuk është tani sezon karrotash në Divjakë, duke iu referuar Ballukut.

Pjesë nga intervista:

Erion Braçe: Do zgjidhja të isha bujk, patjetër me shumë dëshirë

Ke pasion ta drejtosh apo?

Erion Braçe: E bëj vetë, këtu në Tiranë nuk kam asnjë lloj mundësie të merrem me këtë, janë këto katundet e Tiranës. Tani kam mësuar që qarku i Tiranës është prodhuesi i dytë më i madh i produkteve blegtorale në Shqipëri, duhet vëmendje e shtuar në katundet e Tiranës në këtë aspekt. Po ta kisha mundësinë që të kisha tokë do isha marrë me këtë gjë. E  nisa hyja nëpër sera, vilja domate, pastaj pashë Taulantin që nisi të shkulte karota, aty thashë ‘e lashë’, nuk e vazhdova më të bëja nga këto gjërat

Ç’ne Taulanti me karota?

Erion Braçe: Donte të fitonte Divjakën

E mori Divjakën?

Erion Braçe: Nuk mori Divjakën. Mori diasporën, ka ardhur një tjetër që ka marrë Divjakën, edhe shyqyr që ka ardhur në sezon që s’ka karota (Qesh). A më pyete për bujqësinë, t’i them të gjitha.