Guvernatori i Bankës së Shqipërisë, Gent Sejko, i ka kërkuar qeverisë që të rrisë kontrollet ndaj PPP, sepse po përbëjnë rrezik për buxhetin e shtetit. Gjatë fjalës së tij, Sejko tha se duhet me patjetër që të vendoset një tavan afatgjatë për vlerën e përgjithshme të koncesioneve.
“Në linjë dhe me qëndrimet tona të mëparshme, Banka e Shqipërisë sugjeron, përfshirjen e tavaneve ligjore afatgjata mbi vlerën e përgjithshme të kontraktuar të PPP-ve. Ky rregullim do të ishte një element plotësues i kontrollit të nivelit të rrezikut potencial që PPP-të mund të kenë mbi shëndetin e financave publike”, u shpreh Guvernatori.
Po ashtu Sejko ka theksuar se për këto kontrata duhet një monitorim i vazhdueshëm, dhe të përmirësohet mënyra e zgjedhjeve të kontratave koncesionare, në mënyrë që të mos ngarkohet buxheti i shtetit.
“Integrimin e procesit të kontraktimit dhe përzgjedhjes së PPP-ve me programin strategjik të investimeve, sikundër janë identifikuar në programet afatgjata të zhvillimit të vendit. Përmirësimin e vazhdueshëm të kapaciteteve profesionale të njësive që administrojnë vlerësimin, kontraktimin dhe monitorimin e këtyre projekteve, sidomos sa i takon detyrimeve ligjore dhe financiare që ato i ngarkojnë Buxhetit”, u shpreh Sejko.
Nga ana tjetër edhe organizatat ndërkombëtare si BB apo FMN i kanë tërhequr disa herë vëmendje qeverisë për numrin e lartë të koncesioneve dhe rrezikut që sjellin ato.
Discussion about this post