Në vrojtimin e bërë së fundmi Banka e Shqipërisë raporton se, procesi i vaksinimit nuk po jep efekt në ecurinë e ekonomisë. Sipas të dhënave të publikuara, edhe pse procesi i vaksinimit ka filluar prej disa muajsh, ekonomia po ecën në ritme shumë të ngadalta.
Prandaj, BSH i bën thirrje qeverisë që të marrë politika stimuluese për bizneset. Banka thekson se, reformat që do të merren duhet të kenë në fokus biznesin e vogël dhe reduktimin e borxhit publik.
Sipas BSH, duhen ndërhyrje në sistemin fiskal, për të lehtësuar barrën e bizneseve.
“Pavarësisht pritjeve për përshpejtimin e procesit të vaksinimit dhe rigjallërimin gradual të aktivitetit ekonomik, pandemia mbetet e pranishme dhe efektet e saj ruajnë pasiguritë mbi zhvillimet ekonomike. Në këto kushte, është e nevojshme që politikat ekonomike publike të mbeten stimuluese, duke u përshtatur me pritjet për rritjen ekonomike. Për politikën fiskale, në një afat më të shkurtër, merr rëndësi efektiviteti i përdorimit të stimulit fiskal dhe mënyra e financimit të tij, ndërsa në një afat më të gjatë, do të nevojitej ruajtja e angazhimit dhe marrja e masave për konsolidimin fiskal. Ky i fundit është i nevojshëm për të zbutur rreziqet që lidhen me nivelet e larta të borxhit dhe përbërjen e tij”, thuhet në raport.
Ndër të tjera BSH bën me dije se, për shkak të krizës së madhe financiare bizneset kanë marrë borxhe në banka. Më shqetësues është fakti që atyre iu shtohen kamatëvonesat çdo muaj për shkak se nuk kanë aftësi paguese. BSH analizon se, paaftësia likuiduese do zgjasë deri në fund të 2021.
“Rreth 40% e totalit të ndërmarrjeve të përgjigjura deklarojnë se kanë aktualisht hua për të paguar dhe ky tregues është rritur gjatë vitit të fundit. Vlera totale e huasë rezulton afërsisht sa gjysma e vlerës së kapitalit të ndërmarrjes për rreth 80% të totalit të ndërmarrjeve huamarrëse dhe pothuaj e njëjtë me vlerën e kapitalit për 9% të tyre. Pjesa më e madhe e ndërmarrjeve huamarrëse deklarojnë se pagesa e huasë arrin deri në 20% të të ardhurave të tyre”, thekson BSH.
E.H /gijotina.com/
