Deputeti i Partisë Socialiste, Bujar Çela, ka reaguar pas skandalit të djeshëm ku në media qarkulloi fotoja e urimit për Ditën e Pavarësisë, ku krahas flamurit shqiptar, kishte të stampuar një foto të ish-diktatorit Enver Hoxha.
Ndërsa ditën e djeshme deklaroi se dikush i kishte marrë telefonin, sot Çela dha një version tjetër të historisë duke pranuar hapur simpatinë që ka për liderin komunist, ndërsa e konsideroi si udhëheqësi të luftës nacional-çlirimtare.
“Unë pres pyetje të tilla, sepse i përkas atyre që e njohin luftën dhe mendoj që figura e Enver Hoxhës nuk mund të quhet nul. Ka edhe ai kontribute, përderisa ne nuk kemi gjetur një udhëheqës tjetër që e ka udhëhequr luftën. Po të jetë se ka një person që pretendon se gjyshja apo gjyshi i tyre ka udhëhequr këtë luftë të shprehet. Historianët janë aty, letrat janë aty. Shumë herë kemi bërë padrejtësisht armiq, kriminela, këto fakte janë nga më të ndryshëm, që nga Balli Kombëtar, Legaliteti. Në atë komision ka nipër të Isa Toskës. Unë nuk e harroj historinë nga ku kemi ardhur ne sot”, tha Çela.
Mesazhin në fjalë e bëri publik deputeti demokrat, Enkelejd Alibeaj i cili sëbashku me kolegë të tjerë të PD kritikuan veprimin e Çelës, ndërsa vetë deputeti socialist reagoi duke i ofenduar.
Discussion about this post