Opozita ka ndërprerë në mënyrë të papritur protestën para Bashkisë së Tiranës, para orarit fillestar të lajmëruar për përfundimin e saj.
Këtë të premte, ashtu siç ishte planifikuar, në 11:00 nisi protesta e katërt para Bashkisë së Tiranës pas arrestimeve të drejtorëve të Erion Veliajt, për procedimin penal të njohur si “5D”.
Ajo që doli jashtë parashikimeve ishte kohëzgjatja. Ardiana Kalaja, përfaqësuese e Aleancës për Mbrojtjen e Teatrit (që ka depozituar në polici kërkesën për mbajtjen e protestës – siç konfirmoi vetë DVPT), njëkohësisht pjesë e Partisë Demokratike, në nisje të tubimit të sotëm, theksoi se për protestën ishte marrë leje deri në 20:00, por që me gjasë mund të zgjaste edhe pas këtij orari.
Tonet entuziaste për një ‘protestë të zjarrtë’ u konfirmuan edhe nga anëtarë të tjerë të opozitës gjatë fjalimeve të mbajtura nga mikrofoni i tubimit. Për madhështinë e protestës që pritej këtë të premte, ka folur edhe lideri i opozitës Sali Berisha, gjatë ligjërimeve të mbajtura në tubimet poshtë banesës së tij, përgjatë kësaj jave.
“Priti o hajdut qytetarët e zemëruar, të revoltuar. Me ty e kanë. Më shumë veta, më shumë mosbindje civile më shumë të zemëruar, të revoltuar, më të gatshëm për të shkallmuar të keqen nga Shqipëria, dhe për të shpëtuar Tiranën dhe Shqipërinë”, tha Berisha të premten.
“Erion … të jap fjalën e nderit, se edhe në Hënë po shkove, do të kapim dhe do të çojmë atje ku e meriton”, u shpreh kryedemokrati të enjten.
Të Mërkurën, hodhi akuza ndaj SPAK se po amniston Veliajn në procedimin penal për çështjen “5D”.
“Të premten, Erion Veliaj jep dorëheqjen, sepse gjyqin do ta bëjmë në sheshin Skënderbej”, do të shprehej Berisha më herët gjatë fillimjavës.
Pavarësisht deklaratave politike mbushur me pathos, ajo që ndodhi këtë premte ishte shumë larg pritshmërive që vetë opozita kishte krijuar. Qytetarët që u thirrën në tubim nga opozita u gënjyen, teksa në fillim në saj u tha se protesta do të zgjaste të paktën deri në 20:00. Ndërsa dy orë pas fillimit, tubimi u ndërpre papritur. Ishte Adriana Kalaja e cila lajmëroi një protestë maratonë në nisje të saj. Ishte e njëjta e cila tha papritur se tubimi do të mbyllej për këtë të premte, gati dy orë pas fillimit.
Pse ky skenar? Pse protesta u ndërpre papritur?
Pyetja iu shtrua nga gazetarët përfaqësuesve të opozitës, megjithatë nuk mori përgjigje. Nënkryetari i PD-së Flamur Noka tha vetëm se protestat për dorëheqjen e Veliajt do të vijojnë ditët në vijim, megjithatë nuk dha një arsye se pse kjo e sotmja u ndërpre papritur.
Pyetja nuk mori përgjigje as në deklaratën e përfaqësuesve të opozitës jashtë selisë së Partisë Demokratike, ku Flamur Noka, Belind Këlliçi e të tjerë nuk saktësuan se pse tubimi u mbyll para orarit të lajmëruar.
Asnjë sqarim për qytetarët e thirrur në protestë se pse u gënjye për kohëzgjatjen e protestës.
Opozita caktoi vetëm orarin e tubimit të radhës, të martën në 16:30 – kur është planifikuar të mbahet edhe një mbledhje e Këshillit Bashkiak.
Discussion about this post