Klubi i Chelseat po kalon sezonin më të vështirë të 20 viteve të fundit. Jashtë nga Europa, të eliminuar pa shumë histori nga kupat kombëtare, shumë dobët në kampionatin anglez në të cilin ndodhen shumë larg zonës europiane, e vetmja gjë që ka mbetur tani, për të bërënë Stamford Bridge është, të përgatitet sezoni i ardhshëm.
Mungesa eventuale e të ardhurave nga kompeticionet UEFA për klube ndikon shumë, me arkat e klubit që do të mbetet disi thatë. Për këtë arsye Todd Boehly, presidenti i klubit, pas shpenzimeve pa kriter, të kryera gjatë dy seksioneve të merkatos (verore 2022, dimërore 2023), po mendon që tani të “rikuperojë” një pjesë të parave.
Shumë nga lojtarët janë vënë në shitje, me çmime të arsyeshme, për të bërë vend e mbi të gjitha për të bërë klubin të kursejë sado pak për sa i përket pagave.
Ajo që bie në sy është se në shitje është vendosur një nga blerjet e fundit, Kalidou Koulibaly, ish-kapiteni i Napolit. Pavarësisht se është aktivizuar pothuajse gjithmonë titullar, rendimenti i tij, në mbrojtje ka lënë për të dëshiruar. Duhet theksuar se, senegalezi nuk është ambientuar ende me futbollin dinamik e të shpejtë të Premier League.
Emri tjetër në këtë listë, është ai i Pierre-Emerick Aubameyang. Kapiteni i Kombëtares së Gabonit erdhi në Stamford Bridge, pasi ishte jashtë planeve të Barcelonës së Xavit. Që në ndeshjet e tij të para, “Auba” ka dhënë përshtypjen se do ta kishte të vështirë të rigjente formën që e bëri një nga lojtarët më të mirë në rolin e tij. Forma e dobët ishte aq evidente sa ish-trajneri Graham Potter, nuk e futi në listën UEFA për fazën e knockoutit të Champions League, duke e vendosur de facto, fatin e futbollistit.
Gjithashtu, me “plaçkat gati” për të lënë Stamford Bridge, është portieri spanjoll, Kepa. Që nga mbërritja e tij në Londër, ish-gardiani i Athletic Bilbaos është vënë re për gafat e tij si dhe mbahet mend edhe sot e kësaj dite për mosbindjen për të lënë fushën e lojës në finalen e Kupës së Ligës, në vitin 2019. Pavarësisht se ka rifituar vendin e titullarit, në dëm të Mendy, Kepa nuk ka bindur askënd deri tani.
Në klubin londinez, nuk ka më vend as për, Chalobah, Ziyech, Mount, Gallagher, Pulisic, të cilët, shihen si të padobishëm për vazhdimësinë e klubit. Nga këta emra, vetëm Mount duket se e ka të sigurt që do transferohet te Liverpooli, që është i gatshëm të ofrojë 80 milionë euro, ndërsa për sa i përket të tjerëve, duket se do të ketë një garë mes ekipeve angleze dhe europiane për të përfituar nga super-okazioni.
Largim i zhurmshëm do të ishte ai i futbollistit katër herë Kampion të Europës, Mateo Kovacic (3 herë me Realin e Madridit, një herë me blutë e Londrës). Kroati, i ardhur në 2019, ka qënë një nga lojtarët stabël të formacionit, që në ditët e tij të para në klub. Tashmë, problem është rinovimi i kontratës, duke parë që vitin tjetër mund të largohet me parametër zero. City është në krye të listës për të siguruar shërbimet e tij.
I fundit por jo më pak i rëndësishmi, është Romelu Lukaku, blerja e dytë më e shtrenjtë në historinë e klubit. Belgu pritej që të ishte lojtari kryesor i Chelseat të drejtuar në atë kohë nga Thomas Tuchel. Fillimi ishte i mirë, me “Big Rom” që gjeti golat me lehtësi por muajt në vijim rezultuan të vështirë. Sulmuesi nuk e rigjeti super-formën që kishte te Interi (dhe që bëri Chelsean të paguante 115 milionë euro për ta blerë). Sezoni i parë u mbyll në mënyrë skandaloze, në 26 ndeshje në Premier League, ai realizoi vetëm 8 gola, shumë pak për një lojtar kaq të shtrenjtë. Huazimi te Interi në sezonin 2022-2023 dukej se do ishte kura e duhur për të por edhe aventura e dytë në Milano, nuk ka ecur mirë, 5 golat e realizuar deri tani në Serie A pas 31 javësh kampionat, kanë bërë që zikaltërit të mos paguajnë të drejtën e blerjes për futbollistin. Ndoshta tekniku i ri i Chelsea (sipas shumë gazetave pritet të jetë Pochettino) mund t’i japë një mundësi të dytë, dhe pse kjo duket shumë e vështirë që të ndodhë. /m.b. /gijotina.com
Discussion about this post