Tirana, mbetet një nga qytetet më të vështira për të përballuar koston e jetesës në raport me të ardhurat. Kostoja kryesore dhe më e lartë është ajo e banesës, dhe më e vështirë është për çiftet e reja që nisin jetesën në Tiranë, në mes të vrullit të pandalshëm të çmimeve të apartamenteve. Çmimet nga ekspertët e tregut konsiderohen të palogjikshme për vendin.
Bashkia në fushatë, harron kreditë e buta!
Për të ndihmuar familjet e reja Bashkia e Tiranë, prej 2018 nisi një program strehimi, duke miratuar një fond për kredi të buta.
Ky program është premtuar të zbatohet edhe për vitin 2023. Teksa prezantonte buxhetin e vitit 2023, kryetari i Bashkisë Erion Veliaj premtoi 1000 kredi të buta edhe për vitin 2023. Në këtë mënyrë familjet që marrin kredi për blerje banese kanë interes jo më të lartë se 3%, dhe interesi subvencionohet nga Bashkia.
“Ne duam që edhe vitin tjetër të kalojmë një paketë me rreth 1 mijë kredi të buta për të gjitha çiftet e reja që duan një ndihmë nga Bashkia Tiranë për të ecur më tej”, tha Veliaj në nëntor të 2022.
Por teksa po kalojnë 5 muaj, ende Bashkia nuk ka hapur asnjë thirrje për të dhënë kreditë e buta për familjet e reja. Mesa duket fokusimi pas fushatës elektorale për zgjedhjet e 14 majit nuk i ka lënë hapësirë bashkisë Tiranë, të mendojë për çiftet e reja, që presin të bëhen me shtëpi por që çmimet nuk ua mundësojnë një gjë të tillë.
Ndërsa vjet thirrja u hap në fillim të vitit për 727 aplikime, që ishte një numër i ulërt në raport me vitet e kaluara, por që sipas kryebashkiakut kjo rënie vinte si pasojë e krizës që shkaktoi lufta në Ukrainë.
Megjithatë kritikat dhe dritëhijet për këtë skemë nuk kanë të ndalur kjo edhe për shkak se një numër i lartë përfituesisht nga kredia e butë janë nga administrata, punonjës bashkie, specialistë etj.
Ashtu si shumë nisma të qeverisë edhe kjo e kredisë së butë nuk mund të kalonte pa u prekur nga korrupsioni dhe favorizimi, siç ka ndodhur edhe me skemën subvencionit të kredisë së butë që jep Bashkia Tiranë.
Fondet e bashkisë VS çmimet reale të tregut
Për të përfituar nga skema e subvencionit të interesave të kredisë, Bashkia e Tiranës ka vënë edhe disa kritere dhe kufinj për të ardhruat. për çiftet e reja që bashkia thotë se po i mbështet, ajo ju garanton vetëm një garsoniere, dhe vlera totale e kredisë është 4.4 milionë lekë. Për familjet me 3 persona parashikohet apartament 1+1 ose maksimumi është 5.3 milionë lekë, për familjet me 4 anëtarë është përcaktuar apartament 2+1 me vlerë kredie 6.2 milionë lekë dhe për familjet e mëdha me 5-6 anëtar që përkon me apartament 3+1, bashkia parashikon një kredi në vlerën e 7.5 milionë lekëve.
Duke u bazuar në këto fonde që të vë në dispozicion bashkia, të lihet të kuptohet që ajo është shumë e shkëputur nga realiteti, dhe se për këtë skemë nuk është bazuar në çmimet reale të tregut të pasurive të paluajtshme.
Për çiftet e reja që bashkia thotë se po i ndihmon me apartamente, falë kësaj skeme, me paratë që i vë në dispozicion 40 mijë euro, ju garanton në rastin më të mirë një garsoniere 50 metër katror duke marrë si referencë që çmimi për metër katror në Tiranë është rreth 800 euro e lartë dhe në rastin që cifti do të jetojë më afër qendrës ku çmimet variojnë nga 1000-1200 euro, ju garanton vetëm 33 deri në 40 metër katror. Në fakt është e pakuptimtë se përse institucionet në vend nuk hartojnë skema sipas kushteve të tregut, madje skema e subvencionimit të interesave të kredisë, nuk ka ndryshuar që prej vitit 2018 kur u miratua, edhe pse çmimet janë disa fishuar brenda këtyre 5 viteve.
Përveç faktit që një garsoniere, apo një apartament kushton shumë më shumë se ajo që ofron bashkia, është edhe problemi që kredia në asnjë rast nuk financon 100% vlerën e apartamentit.
Për të vërtetuar dhe konfirmuar shembullin e lartëpërmendur mjafton të bësh një vëzhgim online në faqet e agjencive imobiliare, dhe kupton që skema e bashkisë për kredinë e butë, nuk është asgjë tjetër veçse një lëmoshë.
Çmimet marramendëse të apartamenteve
Një apartament 2+1 me sipërfaqe 101 meteër katror në Kinostudio kushton 101,500 euro. E njëjta sipërfaqe në zonën 21 dhjetorit kushton 160 mijë euro. Situata ndryshon nëse afrohesh në qendër, apartamenti 2+1 me sipërfaqe 68 metër katror në Myslym Shyr kushton 110 mijë euro. Pra qartësisht kuptohet që metri katror në Tiranë ka arritur kulmin, nga 1000 euro deri në 1600 euro. Kurse shteti jep si mbështetje nëpërmjet kredisë së butë për një apartament 2+1 vetëm 56 mijë euro. Pra vetëm gjysmën e kostos reale, bazuar në të dhënat e tregut. (çmimet e cituara mund të ndryshojnë nga njëra në tjetrën agjenci, por mbeten në të njëjtat ujëra.
Lexo edhe:Bordi i Transparencës publikon çmimet e reja të karburanteve
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post