Muaji maj ka shënuar një rritje të ndjeshme të çmimeve, duke treguar se shtrenjtimi nuk po ndalet. Nga të dhënat e publikuar së fundmi nga Instituti i Statistikave evidentohet se, çmimet janë rritur më shumë në sektorin e transportit, atë të ushqimeve, akomodimeve dhe më pas vijnë sektorët e tjerë. Konkretisht me 21 % janë rritur kostot për transportin në maj, ndërsa ushqimet janë rritur me 11% krahasuar me një vit më parë. Ndërsa theksojmë se edhe sektori i drithërave, që tashmë është në krizë për shkak të luftës në Ukrainë, ka pësuar rritje të çmimeve me 18% krahasuar me 2021-shin.
“Krahasuar me muajin maj 2021, rritja më e madhe e çmimeve vërehet në grupin “Transporti” me 21,7 %, pasuar nga grupet “Ushqime dhe pije joalkoolike” me 11,4 %, “Hotele, kafene dhe restorante” me 5,3 %, “Pije alkoolike dhe duhan” me 5,0 %, “Mobilje, pajisje shtëpie dhe mirëmbajtje e shtëpisë” me 3,2 %, “Qira, ujë, lëndë djegëse dhe energji” me 2,7 %, “Veshje dhe këpucë” me 1,3 %, “Argëtim dhe kulturë” me 1,2 %, “Mallra dhe shërbime të ndryshme” me 0,9 %, “Komunikimi” me 0,8 %, “Shërbimi arsimor” me 0,6 % dhe “Shëndeti” me 0,2 %. Brenda grupit të ushqimeve çmimet e nëngrupit “vajra dhe yndyrna” u rritën me 29,1 %, pasuar nga nëngrupet “bukë dhe drithëra” me 18,6 %”, thuhet në raport.
Ndërkohë, bëhet me dije se ndryshimi mujor i indeksit të çmimeve të konsumit në muajin maj 2022, krahasuar me prill 2022 është -0,5 %. Krahasuar me muajin prill 2022, çmimet e grupit “Argëtim dhe kulturë” u ulën me 3,1 %, pasuar nga grupi “Ushqime dhe pije joalkoolike” me 1,6 %. Ndërsa, grupet “Pije alkoolike dhe duhan”, “Mobilje, pajisje shtëpie dhe mirëmbajtje e shtëpisë”, “Transporti”, “Hotele, kafene dhe restorante” u rritën me 0,5 % secili, “Qira, ujë, lëndë djegëse dhe energji” me 0,4 % dhe “Veshje dhe këpucë” me 0,1 %.
Discussion about this post