Konfederata Amerikanojugore e Futbollit (CONMEBOL) dëshiron nga FIFA që t’i japë të drejtën të organizojë Kupën e Botës FIFA 2030. Argjentina, Uruguai, Paraguai dhe Kili kanë aplikuar për të mbajtur eventin më të rëndësishëm të planetit në futboll.
Institucioni amerikano-latin i futbollit informoi për objektivin në Kongresin e tij të 76-të. Me sloganin “Juntos” (së bashku) presidenti i konfederatës amerikano-latine Alehandro Dominguez i bëri thirrje FIFA-s që t’i jepte të drejtën për të organizuar eventin kontinentit nga ku, ky kompeticion nisi.
Ndërsa presidenti i FIFA, Xhani Infantino tha se kjo nismë i pëlqen.
“Më pëlqen koncepti i ‘Juntos’ për këtë kandidaturë. Por për të ardhmen e futbollit, koha e përplasjeve dhe problemeve duhet lënë mënjanë dhe duhet të punojmë bashkë që të ecim përpara”, tha ai.
Shtetet amerikano-latine kërkojnë që të festojnë 100 vjetorin e Kupës së Botës, ndërsa për herë të parë kompeticioni u mbajt në Uruguai në vitin 1930.
Maroku, Spanja dhe Portugalia gjithashtu duan të organizojnë Botërorin 2030. Referuar rregullores, FIFA pasi vlerëson kandidatët, përzgjedh ofertat më të mira e në Kongres vendoset se ku do të zhvillohet Kupa e Botës.
Votimi pritet që të bëhet në Shtator 2024.
Discussion about this post