Portugezi Cristiano Ronaldo u transferua nga Europa në Arabinë Saudite, ndërkohë që raportohet gjerësisht se rrugën e tij mund të ndjekë edhe Lionel Messi dhe 50 lojtarë nga ligat më të forta evropiane do të donin të shkonin në të njëjtin destinacion këtë verë.
Një burim i paidentifikuar nga Arabia Saudite zbuloi për gazetarët e ESPN se ky është pikërisht numri i lojtarëve nga Anglia, Spanja, Italia, Gjermania, Franca dhe Portugalia, që do të përpiqen të nënshkruajnë kontrata me klubet nga ajo ligë këtë verë.
Disa prej tyre mund të jenë emra të tillë të famshëm si Roberto Firmino nga Liverpool dhe Adama Traore nga Wolverhampton, por edhe shumë të tjerë.
“Mos prisni që të jetë një furi si në Kinë disa vite më parë, kur u shpenzuan shuma të mëdha parash për sjelljen e lojtarëve. Futbolli në Arabinë Saudite po zhvillohet me shpejtësi duke u bërë masiv, gjë që u pa në Kupën e Botës të përfunduar së fundmi në Katari dhe gjithçka po funksionon sipas planit”,- ka thënë burimi i kësaj gazete dhe ka shtuar:
“Qëllimi i drejtuesve të kompeticionit është ta bëjnë Ligën Saudite ligën më të mirë në rajon, por jo të tërheqin një numër kaq të madh lojtarësh nga Europa”.
Discussion about this post