Debate në Komisionin hetimor për TIMS, socialistët braktisin sallën

Komisioni Hetimor për Trajtimin e të dhënave TIMS nisi me debate këtë të mërkurë.

Ministri i brendshëm Taulant Balla kërkoi që mbledhja gjatë dëshmisë së tij të zhvillohet me dyer të mbyllura, kërkesë që që nuk u pranua nga kryetari i Komisionit Ervin Salianji.

“Nuk jemi në kushtet kur komisioni do shqyrtojë ndonjë dokument shtetëror. Dokumentat jane administruar dhe nuk ka sekret. Shpallim në kërkim Ballën, punonjësit e gardës ta gjejnë se ku është fshehur. Duhet të vijë. Pasi të vijë Balla dhe të marrë fjalën atëherë do flasim.

Nuk bëhet kjo me sufler dhe me njerëz që bëjnë si të shqetësuar. Kur të vijë ministri dhe ta parashtrojë kërkesën atëherë e vendosim”, tha në fillim të mbledhjes Salianji.

Ndërkohë në  debat e sipër socialistët dolën nga salla dhe braktisën komisionin, pasi ata më herët kërkuan pushim nga Salianji.

Sipas axhendës në seancën e sotme të Komisionit Hetimor për trajtimin e të dhënave të sistemit “TIMS”, ku është dakordësuar që të dëshmojnë ministri i Brendshëm, Taulant Balla, drejtori i Përgjithshëm i Policisë së Shtetit, Muhamet Rrumbullaku dhe ish-drejtori i Departamentit të IT në Policinë e Shtetit, Ervin Muça. Por me zhvillimet e fundit kjo seancë rrezikon të mos mbahet sot.

Debatet:

Salianji: 5 minuta përpara PS ka shpërndarë njoftim ku thotë se media do zhvillohet e mbyllur. Mbledhja nuk ka nisur ende, partitë mund të vendosin në forumet partiake por nuk vendosin dot në këtë komision. Këtu vendosin deputetët dhe anëtarët e këtij komisioni. Unë ftoj ministrin e brendshëm si dëshmitarin e parë.

Gogu: I nderuar zoti kryetar, para se të filloj me kërkesat proceduriale kam një kërkesë miqësore. Keni nevojë urgjente për këshillim juridik. Keni nevojë për këshillim juridik në rolin e kryetarit të këtij komisioni sepse e keni zbythur këtë komision që në fillim. Ky komision është vend pune, nuk është vend spektakli. E premtuat në fillim spektaklin

Salianji: Do ta shihni, unë i mbaj premtimet.

Gogu: Spektakli i këtij komisioni janë vendimet jo sa herë del ti në televizor. Institucionet shtetërore të kanë ardhur me kërkesa. Po bën sjelljen e diversantit, po gënjen kur thua që PS ka njoftuar që nuk do zhvillohet mbledhja, ndërkohë që duhet të lexosh kërkesën e ministrit të Brendshëm.

Urgjentisht hidh në votim kërkesën e institucioneve shtetërore. Thërriti ministrin, sepse e kujton këtë komision që është ky.

Salianji: Mos thuaj ky, se të vjen një fjalë e keqe. Mos e përdor sikur je në rrugë, por thuaj zoti kryetar, ose zoti Salianji.

Gogu: Ato fjalë i përkasin kulturës tuaj!

Është në nder të këtij komisioni që kërkesat e autoriteteve shtetërore kërkojnë hetim me dyer të mbyllura, të mbyllë gojën dhe të hapë veshët që të mund të flasë me vendim përfundimtar. Jam i indinjuar që po shkelet ligji. Këtu i bëtë kërkesat e paligjshme, si do lexojë serverin ky, kur nuk lexon ligjin ky. Do bëhet oficer i policisë gjyqësore ky. Të mbyllë urgjentisht dyert dhe të fillojë nga hetimi. Cdo sekondë që kalon tregon se ky nuk do hetim.

Salianji: Nuk emocionohet nga këto që thua ti.