Deputeti i Partisë Demokratike, Agron Shehaj ka reaguar për debatin me dyer të mbyllura që ka pasur në mbledhjen e fundit të kryetarëve të PD, në degët e Tiranës.
Përmes një postimi në Facebook, Shehaj pranon se ka pasur një debat në mbledhje, por thotë se disa prej deklaratave që janë bërë publike në media nuk janë të vërteta.
Ai e ka konsideruar si të manipuluar zbardhjen e debatit të bërë nga mediet, ndërsa shkruan se i ka argumentuar Bashës pakënaqësitë që kanë një pjesë e mirë e demokratëve.
“Nisur nga zbardhja e manipuluar e debatit, e shpërndarë në media me qëllim për të më denigruar dhe fshehur të vërtetën, ndihem i detyruar të bëj publik qëndrimin tim në mbledhjen me dyer të mbyllura. Iu drejtova z.Basha duke thënë se pakënaqësia tek mbështetësit e Partisë Demokratike nuk është e vogël, siç e parashtroi ai, por fatkeqësisht ka një përçarje të madhe dhe kurrsesi s’mund të jem dakord me strategjinë “t’i marrim me të mirë dhe të presim t’u dalë inati””.
Ndër të tjera, ai shkruan se në kushtet kur një pjesë e madhe e votuesve janë kundër PD, nuk mundet që në krye të axhendës të jetë shpëtimi i karriges.
”Argumentova se pjesa më e madhe e votuesve të Partisë Demokratike janë kundër drejtuesve të Partisë Demokratike. Në këto kushte, agjenda jonë s’mund të jetë shpëtimi i karriges së kryetarit por e mira e Partisë Demokratike”, shkruan Shehaj.
Në fund, Shehaj në mënyrë indirekte konsideron si servila Grida Dumën dhe Gazment Bardhin që e kundërshtuan gjatë mbledhjes dhe u shprehën se kanë video sesi Shehaj është ndihmuar në fushatën për kreun e PD nga njerëz që kanë mbajtur qëndrime kundër kësaj force politike.
