Në konferencën e përbashkët, të dy kryeministrit e Shqipërisë dhe Kosovës, u pyetën ndër të tjera edhe për përplasjet që kanë për procesin e Ballkanit të Hapur, ku Kosova ka refuzuar të marrë pjesë.
Kreu i qeverisë kosovare, Albin Kurti u shpreh në takimin e sotëm nuk ishte folur fare për fqinjin verior të Kosovës, duke iu referuar Serbisë.
“Këto takime dëshmojnë që Shqipëria dhe Kosova mund të dakordohen pa e përmendur fqinjin verior të Republikës së Kosovës. Ajo çfarë bëmë ne sot është liberalizimi i kufirit për qytetarët dhe bashkëpunimi i zyrtarëve, kufiri po relativizohet për qytetarët dhe po shtojmë bashkëpunimin, meqë është përgjegjësi e jona”, tha Kurti.
Nga ana tjetër, kryeministri Rama, njëkohësisht një ndër tre iniciatorët e “Open Balkan”, u shpreh se është normale që ata të mbajnë qëndrime të ndryshme për çështje të caktuara.
“Mendimi i Shqipërisë, i kësaj qeverie, mendimi im, nuk është as sekret dhe as i panjohur. Është i njëjti mendim që unë e kam shprehur dhe në mes të Beogradit, sa i takon Ballkanit të Hapur kemi dy qasje të ndryshme, nga ana tjetër të gjithë duhet të mësohemi, që mund të mos mendojmë njësoj për të gjitha gjërat, kjo nuk na pengon që të bëjmë gjërat e duhura për vendet tona. Këto opinione të ndryshme nuk përbëjnë asnjë pengesë për të fuqizuar marrëdhëniet mes nesh, dhe nëse më lejoni t’i referohemi shqiponjës me dy koka”, u shpreh Rama.
Discussion about this post