Deputeti demokrat Tritan Shehu, pjesë e Komisionit të Rithemelimit, kundërshton propozimin e grupit parlamentar të PD-së që pas dorëheqjes së Lulzim Bashës nga posti i kryetarit, të ndodhë edhe distancimi i Sali Berishës. Me anë të një postimi në Facebook, Shehu shkruan se Basha liroi zyrën që po e mbante padrejtësisht me ndihmën e shkopinjve dhe gazit të Ramës.
“Po lexoj një “deklaratë” në “emër” të grupit parlamentar! Por pa u pyetur edhe vetë grupi parlamentar! Një deklaratë që veçse tregon së paku konfuzionin e atij qe e hartoi. Të nderuar kolegë deputetë! Le të jemi të qartë, Z.Basha sot veçse pranoi të ekzekutojë, nën presionin e anëtarëve të PD dhe votuesve të saj, vendimin për shkarkimin e tij nga posti i Kryetarit të PD, i ratifikuar ky prej 18 Dhjetorit. Asgjë tjetër, ai që prej asaj date nuk ishte kryetar. Në fakt ai kështu po liron një zyrë të mbajtur padrejtësisht me ndihmën e shkopinjve dhe “gazit” të Ramës. Sidoqoftë ne të gjithë se bashku duhet ta shfrytëzojmë këtë ngjarje, për të çuar në normalitet PD e grupin e saj parlamentar. “Deklarata” që dëgjova pak më parë nuk ndihmon në këtë drejtim, përkundrazi ajo tingëllon si ai “litari” i lënë jashtë “varrit”, që synon të na kthejë në pikën fillestare. Bashkimi i te gjithëve neve, tashmë është një realitet që po ndodh” – tha Shehu.
Shehu gjithashtu tha se deklarata të tilla të hedhura me nxitim nga individë, nuk ndihmojnë këtë proces të dëshiruar. Sipas tij, normalizimi kërkon aplikimin e çfarë është thelbësore në demokraci.
“Ky proces do te finalizohet duke qene se bashku, duke dënuar si staliniste edhe ato “pezullime” e “përjashtime” jo statuore, që për turp vazhdojnë të artikulohen dhe në këtë letër të shpërndarë. Ky normalizim duhet të fillojë, ashtu siç po ndodh realisht, nga Grupi Parlamentar, nga ne deputetet, për të reflektuar më tej në të gjithë PD. Deklarata të tilla të hedhura me nxitim nga individë, nuk ndihmojnë këtë proces të dëshiruar. Normalizimi kërkon aplikimin e çfarë është thelbësore në demokraci:
1-Hapësira për të gjithë ne bashkëjetesë si të barabartë midis të barabartësh.
2-Njohjen e votës së lirë si mekanizmin për zgjedhjet dhe vendimmarjet në PD.
Kush merr mbi vete të drejtën për të përjashtuar apo pezulluar kolegët, nuk mund të jetë demokrat dhe as i shërben demokracisë e PD. Ngjarjet e këtyre muajve të fundit e rikonfirmuan këtë të vërtetë të madhe. Janë këto rregulla, që duhet të implementohen menjëherë, të mbledhur së bashku për të zgjedhur drejtuesit tanë reale, duke filluar nga grupi parlamentar e vazhduar me tej në të gjithë nivelet e PD…deri në zgjedhjen e lirë të kryetarit tonë të ardhshëm. Për të dalë përfundimisht kështu nga kriza ku na ka futur mentaliteti “anti-votë”, për të mos u përsëritur kurrë këto ngjarje të rënda” – shkruan Shehu.
Discussion about this post