Edhe gjatë muajit gusht bizneset do të dorëzojnë deklaratën e TVSH-së dhe librave të Shitjes dhe Blerjes nëpërmjet llogarisë së deklarimit elektronik në e-filing.
“Risjellim në vëmendje të tatimpaguesve se afati për fiskalizimin e transaksioneve pa para në dorë B2B ishte data 1 Korrik 2021 dhe duhet të marrin masa të menjëhershme për të plotësuar kërkesat e nevojshme, ndërkohë që po afron data 1 Shtator, e cila është afati i Fiskalizimit edhe të transaksioneve me para në dorë”, thuhet në njoftimin e tatimeve.
Në 1 korrik hyri në fuqi faza e dytë e fiskalizimit, për transaksionet pa para në dorë mes tatimpaguesve. Teksa gati gjysma e 34 mijë subjekteve që duhet të zbatonin këtë fazë nuk e kishin nisur ende procesin Drejtoria e Përgjithshme e Tatimeve sqaroi se përdorimi i dokumentacionit tatimor ekzistues do të vijojë deri në datën 31.08.2021. Tërheqja e këtij dokumentacioni nga tatimpaguesit, pranë Drejtorive Rajonale, ku ata janë të regjistruar, do të mund të kryhet deri në datën 15.08.2021.
