Legjenda e skuadrës së Dinamos, Sulejman Demollari është prononcuar në lidhje me problematikat që ka shfaqur ekipi kryeqytetas. Ai ka theksuar se Dinamo nuk ka grintë dhe ide si dhe zbulon se ishte larguar nga stadiumi në pjesën e parë në derbin ndaj Tiranës.
“Kur përfundoi pjesa e parë ika nga stadiumi sepse e dija që do të shkonte më keq në pjesën e dytë. Nuk e di pse, por pashë që skuadra nuk pati dëshirë në fushë, nuk pati atë egon sportive për ta fituar ndeshjen apo për të bërë diçka të mirë.
Unë jam tip që e ndiej shumë emocionalisht atë që shoh në fushë dhe me Dinamon jam i lidhur që fëmijë. Nuk jam tip që bërtas, çirrem apo ulëras në stadium, e përjetoj brenda meje, ndaj dhe ika në pushim”,
Nuk mendoj se është puna e mungesave sepse siç e thashë që në fillim, nuk pashë grintë dhe ego nga lojtarët në fushë.
Te Dinamo janë bërë shumë gjëra të rëndësishme, e kemi thënë gjithmonë, sepse zoti Bardhi e ka marrë jo nga zeroja, por nga minusi. Është bërë skuadra nga e para, klubi, infrastruktura dhe akademia. Mendimi im është që në këtë moment skuadra është në vështirësi dhe duhet mbështetur për të reaguar që në ndeshjen e radhës.
Kam dëgjuar të flitet për merkaton. Po, skuadra ka nevojë, si çdo skuadër tjetër, uroj që të vijnë ato përforcime që t’i bëjnë punë Dinamos”, tha Demollari.
Discussion about this post