Deputeti i Partisë Demokratike, Kastrot Piroli ka denoncuar mungesën e bonuseve për familjet e prekura nga tërmeti. Sipas tij në Kurbin prej 3 javësh 1500 familje janë pa bonus qiraje.
Ai akuzon qeverinë se ka mashtruar qytetarët dhe se pas 2 vitesh nga tërmeti 6 mijë qytetarë të Laçit nuk kanë shtëpitë e tyre.
“Braktisja e madhe e qeverisë në Kurbin. Prej 3 javësh 1500 familje pa bonus! Qeveria të mos vjedhë për pak orë dhe të zgjidhë menjëherë problemin! Arben Ahmetaj mashtroi sërish sot banorët e Kurbinit. 2 vite pas tërmetit shkatërrimtar, të paktën 6 mijë laçianë jo vetëm nuk kanë hyrë akoma në shtëpitë e tyre, por nuk marrin më as bonusin e qerasë. Bonusi duhet të ishte në llogaritë e qytetarëve prej datës 1 tetor. Sot është mesi i muajit dhe banorët e dëshpëruar gjenden përpara llogarive bosh!” – shkruan Piroli.
Më tej ai shton se 1500 familje janë në gjendje mbijetese dhe vonesa e bonusit të qirasë, i detyron kryefamiljarët kanë hequr paratë e bukës së gojës së fëmijëve për të paguar qiranë.
“1500 familjet janë në gjendje mbijetese! Çdo ditë vonesë e bonusit të qerasë do të thotë që kryefamiljarët kanë hequr paratë e bukës së gojës së fëmijëve për të paguar qiranë, që ka marrë përsipër ta paguajë qeveria. Jam i bindur që Edi Rama dhe Arben Ahmetaj nuk duan t’ia dinë për jetën e vërtetë të vështirë të njerëzve të ndershëm, sepse ata jetojnë mes luksit. Vetë darkojnë te Nusreti, ndërsa për qytetarët e Kurbinit nuk paguajnë as detyrimin ligjor të bonusit të qerasë. Është e pafalshme kjo mizori kundrejt njerëzve më të pamundur. Qeveria ka para, por i ka për të vjedhur me tenderët e energjisë. Le të mos vjedhin për disa orë dhe t’u japin banorëve të Kurbinit urgjent bonusin e vonuar prej 3 javësh. Le t’i lënë llogaritë e rrogave të tyre bosh dhe të mos luajnë me bukën e gojës!”- shkruan Piroli.
