Ish-deputeti demokrat Belind Këlliçi denoncoi publikisht këtë të mërkurë se kryebashkiaku i Tiranës Erion Veliaj ka pasuri të fshehura te kompleksi “Square 21”, ndërtuar nga firma “ARLIS” e Armand Lilos.
Këlliçi kujtoi depozitimin e dokumenteve në SPAK që sipas tij, tregojnë se “ARLIS”, në bashkëpunim me Bashkinë Tiranë kanë grabitur mijëra metra katrorë tokë publike, në të cilën është ndërtuar kompleksi “Square 21” – që shtrihet në zonën e 21 Dhjetorit, në kryeqytet.
“Më 3 nëntor it 2023, me shkresën nr. prot. 271, i kam përcjellë zyrtarisht informacion z. Altin Dumani për fakte të rënda penale, fakte që përfshijnë Bashkinë Tiranë, kompaninë “Arlis Ndërtim” dhe kompleksin ‘Square 21’. Në atë informacion zyrtar, kemi vënë në dijeni SPAK-un se shtetasi Erion Veliaj, në bashkëpunim me famozin Armand Lilo të 7 kateve pa leje në mes të Tiranës, kanë fallsifikuar dokumentacionin e pronës publike, në një pjesë të së cilës është ndërtuar kompleksi ‘Square 21’”, tha Këlliçi në një deklaratë nga selia blu.
“Leja e jashtëligjshme, i përfshirë dhe Fatmir Xhafaj”
Më tej gjatë fjalës së tij, Këlliçi tha se leja e ndërtimit për projektin u firmos nga Veliaj në kundërshtim dhe ligjin. Këlliçi akuzoi se i përfshirë në aferë është dhe ish-ministri dhe aktualisht deputeti socialist Fatmir Xhafaj.
“Erion Veliaj, ka miratuar lejen e ndërtimit për atë projekt, pa patur asnjë tagër ligjor mbi këtë pronë publike. Disa muaj më vonë, Këshilli i Ministrave me propozimin e Ministrit të Brendshëm të asaj kohe Fatmir Xhafaj, është munduar të mbulojë këtë paligjshmëri për të shpëtuar nga prangat kryebashkiakun e Tiranës. Pronari faktik i Inceneratorit Tiranë Erion Veliaj, nuk është mjaftuar me kaq. Pasi përveç 5.000 metrave katrorë pronë publike, i dha të drejtën kësaj kompanie, të shembte godinat ku ushtronin detyrat e tyre Policia Bashkiake dhe Drejtoria e Tatim Taksave Tiranë, për të ngritur përbindësha të rinj betoni shumëkatësh në zemër të Tiranës”, tha anëtari i kryesisë së PD-së.
“Pronari faktik i Inceneratorit Tiranë Erion Veliaj, sipas e-maileve të bëra publike nga kjo foltore, ka favorizuar subjektin “Arlis Ndërtim” për të depozituar dherat në landfillin e Sharrës pa pagesë, në lidhje me këtë projekt korruptiv. Për subjektin “Arlis Ndërtim”, Erion Veliaj ka fallsifikuar letrat e pronës, ka miratuar lejen e ndërtimit në kundërshtim me ligjin si dhe minimalisht i ka kursyer atij kompleksi ndërtimi të paktën 1 milionë euro kosto për depozitimin e dherave”, shtoi.
“Veliaj asete te kompleksi “Square 21”
Më tej, ai akuzoi se Erion Veliaj është pronar i fshehtë në kompleksin “Square 21” dhe i bëri apel Prokurorisë së Posaçme të marrë veprime lidhur me çështjen.
“Pyetja që shtrojmë sot për Prokurorinë e Posaçme është: A është regjistruar nga ana juaj, ky kallëzim penal i depozituar 6 muaj më parë? A nuk janë këto veprime, tregues i qartë i veprimtarisë të një pronari faktik të kompleksit “Square 21”? I bëjmë thirrje sërish SPAK, të administrojë të gjithë dokumentacionin e kompleksit “Square 21”, të administrojë të gjithë kontratat e shitjes, kontratat e kleringut dhe njëlloj si në rastin e Olti Bistrit, të sekuestrojë të gjithë asetet e fshehura të drejtorëve të Bashkisë Tiranë dhe vetë Erion Veliajt në këtë kompleks”, tha Këlliçi.
Discussion about this post