Shërbimet Sekrete të Greqisë kanë arritur të shmangin atentatin ndaj kryeministrit të Maqedonisë së Veriut, Zoran Zaev. Jeta e Zaev është shpëtuar nga shërbimet sekrete greke pasi zbuluan se po përgatitej një tentativë për ekzekutimin e tij.
Lajmi është konfirmuar nga mediat greke të cilat bëjnë të ditur se shërbimet sekrete greke dhe qeveria parandaluan një atentat ndaj kreut të Maqedonisë së Veriut, Zoran Zaev disa muaj pas nënshkrimit të Marrëveshjes së Prespës në verën e vitit 2018 dhe para se Parlamenti i Shkupit të votonte ndryshimin e Kushtetutës me 80 vota.
Kjo u zbulua nga një burim i brendshëm nga Ministria e Punëve të Jashtme të Greqisë, i cili ishte në të njëjtën kohë ndërlidhës joformal me shërbimet sekrete dhe Ministrinë e Mbrojtjes, dhe që luante një rol të rëndësishëm në të gjithë rastin në fjalë.
Sipas burimit, pas ratifikimit të Marrëveshjes së Prespës nga Parlamenti i Shkupit me 69 vota më 20 qershor (Marrëveshja u nënshkrua më 12 qershor në fshatin Psarades të Follorinës në Prespë), tensioni politik arriti kulmin në vendin fqinj.
Shërbimet sekrete greke informojnë kryeministrin e atëhershëm Alexis Tsipras se ka lëvizje të madhe në Shkup, kundër Zaevit. Qeveria në atë kohë po bashkëpunonte me shërbimet amerikane, të cilat i dinin reagimet, por nuk dinin rëndësinë e tyre.
Në të njëjtën kohë, shërbimet amerikane u shprehën se “forcat që kanë interes të mos nënshkruajnë Marrëveshjen do të kërkojnë të parandalojnë ndryshimin e Kushtetutës (të Maqedonisë së atëhershme) nga Parlamenti” .
Përpjekja për atentatin dyshohet se u financua nga disa organizata të huaja dhe ishte planifikuar nga zyrtarë të inteligjencës të vendeve të treta, të cilët shfaqen në Shkup, si agjentë tregtarë ose si drejtues të medias.
Amerikanët morën në mbrojte kryeministrin e Shkupit dhe u dërguan mesazhe ambasadave të huaja dhe VMRO -së që ata “e dinë” për sulmin. Në ato muaj, Zoran Zaev kishte një mbrojtje të barabartë me atë të presidentit amerikan, diçka që ishte e qartë për të gjithë.
