Dështon vrasja në Shkodër, i riu shkon në kalçeto për të ekzekutuar ish-shokun, por nuk i shkrep arma

Një konflikt i hershëm mes dy të rinjve, që dikur kanë qenë shokë të afërt, përfundoi në një tentativë vrasjeje brenda një kalçetoje në Shkodër.

Klaus Fermosi, 25 vjeç, dyshohet se ka shkuar në ambientet e fushës sportive mbrëmjen e 11 tetorit me qëllimin për të vrarë Jozefin Ujkën, 26 vjeç, por tentativa e tij ka dështuar pasi pistoleta me të cilën tentoi ta qëllonte nuk është shkrepur.

Në ato momente, në kalçeto ndodheshin edhe persona të tjerë, të cilët kanë ndërhyrë duke larguar Fermosin nga vendi i ngjarjes. Kjo ndërhyrje, së bashku me faktin që arma nuk u shkrep, bëri që Jozefin Ujka t’i shpëtonte mrekullisht asaj që mund të kishte përfunduar në një vrasje.

Pas ngjarjes, policia e Shkodrës ka identifikuar dhe shpallur në kërkim Klaus Fermosin.

Konflikti nisi 5 vite më parë për një vajzë

Pas kësaj ngjarjeje dyshohet se fshihet një konflikt i vjetër mes dy të rinjve, të cilët më herët kanë qenë shokë të afërt. Rreth pesë vite më parë, Klaus Fermosi dhe Jozefin Ujka janë përfshirë në një konflikt për shkak të një vajze.

Në atë kohë, situata mes tyre u mbyll pas ndërhyrjes së dy familjeve, të cilat arritën ta zgjidhnin përplasjen. Megjithatë, duket se marrëdhënia mes dy të rinjve nuk është normalizuar përfundimisht.

Rreth një vit më parë, ata dyshohet se e kanë rihapur konfliktin, duke rikthyer përplasjet mes tyre.