Një ngjarje e pazakonte është regjistruar në Uzinën e Ferrokromit Burrel, e cila tashmë administrohet nga kompania turke “Yildirim”.
Drejtori i kësaj uzine, Ervin Isaj është dënuar nga Gjykata e Matit pasi ka ushtruar dhunë ndaj punonjësit Hamit Metra. Ky i fundit e ka paditur drejtorin për dhunë pasi e ka kapur për fyti vetëm pse kishte shkuar të pijë ujë.
Hamiti shprehet për mediat se për këtë i është drejtuar gjykatës së Matit në vitin 2022 dhe Gjykata ka vendosur në favor të tij duke e dënuar drejtorin nën akuzën e “Dëmtime të tjera me dashje”, parashikuar nga neni 90 i Kodit Penal. Metra shprehet se çështja vazhdon në apel, ndërsa shton se ndaj drejtorit nuk është marrë asnjë masë disiplinore nga kompania.
Ndërkohë, Drejtori Ervin Isaj shantazhon edhe punonjësit e tjerë të cilët dolën dëshmitar ndaj dhunës së ushtruar ndaj Metrës. Albert Patushi denoncon se nga Drejtori Isaj, po ushtrohet presion në forma të ndryshme ndaj 9 punonjësve të tjerë të cilët mbrojtën kolegun e tyre në gjykatë.
Patushi kërkon që ndaj Isajt të merren masa nga kompania, dhe të reagojnë sindikatat ku aderojnë punëtorët e Uzinës së Ferrokromit në Komsi.
Nga ana tjetër, punonjësit e Uzinës thonë se nuk do të ndalen deri sa të marrin të drejtat e tyre dhe drejtori të mbajë përgjegjësi për veprimet e kryera në kundërshtim me Kodin e Punës.
Vendimi i Gjykatës:
Gjykata mban parasysh qëndrimin e tij të thellë pendues dhe dëshirën e tij për të normalizuar marrëdhënien me viktimën akuzuese, faljen që ai i kërkoi trupit gjykues dhe faktin që ai shprehu gatishmërinë e tij që këtë falje ta bënte edhe përpara kolektivit apo familjarëve të viktimës dhe deri dhe në median lokale me qëllim pajtimin midis palëve, por që nuk u pranua nga viktima akuzuese.
Për këto arsye, Gjykata, bazuar në nenet 59-60, 390 të Kodit të Procedurës Penale, në nenet 1/c, 47-50, 34, 90/1, të Kodit Penal, vendosi:
Deklarimin fajtor të të pandehurit Ervin Isaj, për kryerjen e veprës penale “Dëmtime të tjera me dashje”, parashikuar në neni 90/1 i K.Penal dhe në bazë të kësaj dispozite, dënimin e tij me 50000 (pesëdhjetëmijë) lekë gjobë.
Discussion about this post