Të dyshuarit si autorë të plagosjes së rëndë të avokatit Marjel Mejdi kërkojnë lirinë. Në Gjykatën e Sarandës është regjistruar dje kërkesa e Aleks Rexhës, 58-vjeç nga Gjirokastra, i cili kërkon revokimin e masës së sigurisë “Arrest në shtëpi” dhënë ndaj tij në 15 korrik 2021 nga Gjykata e Sarandës.
Në atë seancë Prokuroria kishte kërkuar masën “Arrest në burg 45 ditë” për Rexhën. Kërkesa për revokimin e masës së sigurisë është regjistruar në 2 gusht në Gjykatën e Sarandës dhe do të shqyrtohet nga gjyqtari Fatmir Ndreu.
Ndërkohë mësohet se kërkesë për revokim mase sigurie ka bërë edhe një nga të dyshuarit e tjerë për të cilët është vendosur masa e sigurisë “Arrest në burg” në mungesë. Marjel Mejdi, avokat, ish-Drejtor në Ministrinë e Brendshme u plagos rëndë me sende të forta në 5 korrik në mes të ditës në rrugën pranë Portit detar të Sarandës. Ai u mjekua në Spitalin e Sarandës, më pas në atë të Janinës për shkak të gjendjes së rëndë e aktualisht ndodhet në regjim shtrati në banesën e tij deri në rehabilitim të thyerjeve në dorë e këmbë.
