Kryeministri Edi Rama ka konfirmuar qëndrimin e Qeverisë shqiptare se nuk mund të përkrahë deklaratën e Bashkimit Europian lidhur me dialogun Serbi-Kosovë, pas ngjarjes së fundit, kur nga një grup kriminal u vra një efektiv i policisë së Kosovës.
Rama tha se nuk mund të linjëzohemi me BE-në pa një qëndrim të dytë të saj, në pëputhje me realitetin e ri të krijuar.
“Deklarata e BE-së nuk i përgjigjet këtij realiteti”, tha Rama. Sipas tij, grupi kriminal ka qenë i investuar për terror.
“Qëndrimi ynë për herë të parë në kundërshtim me një deklaratë të politikës së jashtë të BE-së. Ky qëndrim lidhet me faktin se deklarata e BE-së, është një deklaratë e cila jo se në vetvete ka problem, pasi adreson gjithçka që është thënë më parë nga Borrell, në lidhje me detyrimet e Kosovës. Por nuk i përgjigjet realitetit të ditëve të fundit. Nuk mund të linjëzohemi me BE-në, pa parë një deklaratë të dytë që adreson problematikën e ditëve të fundit. Ku ka ndodhur një zhvillim dramatik. Është vrarë një efektiv i policisë së Kosovës nga një grup kriminal që ka qenë i investuar. Kjo për ne është e papranueshme. E dënueshme. Joeuropiane dhe sepse është sinjali më i keq që mund të jepte Serbia në këtë moment.
BE-ja të vërë alarmin në nivelin më të lartë. Të përdorë të gjithë instrumentet në dispozicion për t’i kthyer mesazhin e duhur, këtij mesazhi krejtësisht të paparanueshëm që vjen nga shpallja e zisë kombëtare në Beograd. Derisa të ketë një deklaratë të dytë për të vendosur me drejtësi një gjykim për ditët e fundit, ne nuk do të linjëzohemi me deklaratën e parë. Në këtë pikë, linja jonë është 100 për qind e BE-së, por është momenti për të dënuar me zë të lartë atë që ka ndodhur në veriun e Kosovës dhe me atë që ka ndodhur në Beograd”, tha Rama nga Roma.
Në deklaratën e 19 shtatorit të Bashkimit Europian thuhet se “BE mbetet po aq e shqetësuar për mungesën e progresit nga të dyja palët për depërshkallëzimin e tensionmeve në Veri të Kosovës, disa muaj pas shpërthimit të fundit të dhunës që solli lëndime të qytetarëve, trupave të KFOR, policisë dhe përfaqësuesve të mediave, disa me pasoja të rënda dhe të përhershme”.
Kjo është një pjesë e deklaratës së 19 shtatorit, dhe arsyeja pse Tirana zyrtare nuk e ka mbështetur atë, vjen prej faktit se BE vë në pozita të barabarta përgjegjësie Kosovën dhe Serbinë dhe nuk ka reflektuar në të qëndrimin për ngjarjet e 24 Shtatorit, kur një grup i armatosur paramilitarësh serbë sulmuan policinë e Kosovës dhe vranë një rreshter të saj në krye të detyrës.
Discussion about this post