Është mbyllur në barazim pa gola ndeshja mes Dinamos dhe Skënderbeut, me dy gola të anuluar nga “VAR” në “Elbasan Arena”.
Skënderbeu shënoi me anë të Mensah në minutën e e katërt, por goli u anulua për një faull ndaj Sforanac.
Në të dytën ishte Dinamo që do të gjente rrugën e rrjetës me anë të Siljanovskit, por sërish goli do të anulohej, këtë herë për pozicion jashtë loje.
Në minutën e 71-të Bardhi tentoi portën e korçarëve, por topi shkoi jashtë pa rrezik për Rexhepin.
Edhe në këtë ndeshje 17-vjeçari Simoni bëri heroin për “blutë” dhe në minutën e 81-të u hodh në këmbët e Vangjelit, duke evituar një gol të sigurt.
Një minutë më vonë u pretendua për një penallti nga korçarët, pas një prekje të topit me dorë të Maliqit, por gjyqtari bëri shenjë që loja të vazhdojë.
Në kohën shtesë ishte Mihana ai që pati mundësinë të kalojë të besuarit e Bledi Shkëmbit në avantazh, por nuk arriti të gjente portën në një goditje të topit më kokë.
Simoni bëri sërish heroin në minutën e fundit të kohës shtesë, kur ndali Mensah në atë që mund të ishte një gol i sigurt.
Skuadrat vijojnë të jenë në kuotë të barabartë pikësh (15) me Dinamon në vendin e shtatë dhe Skënderbeun një pozicion më poshtë. Për dinamovitët kjo është ndeshja e pestë pa fitore. Ata kanë mundur të sigurojnë vetëm dy barazime dhe kanë pësuar tre humbje në 5 sfidat e fundit.
Discussion about this post