Kryeministri i Kosovës, Albin Kurti, ka reaguar me urgjencë pas situatës së tensionuar në veri të vendit, ku thotë se nga hetimet paraprake, zjarrvënia në dy zura në Zubin Patok dhe në Zveçan janë të qëllimshme.
“Hetimet preliminare tregojnë që djegia e ndërtesës së Qendrës së Regjistrimit të Automjeteve në Zubin Potok nuk ishte aksidentale por e qëllimshme. Edhe në Zveçan kanë hedhur dy bomba dore, po ashtu në ndërtesën e qendrës së njëjtë për regjistrimin e automjeteve, por ato fatmirësisht nuk kanë eksploduar. Individë ose grupe të cilave sundimi i ligjit dhe rendi e siguria publike ua rrezikon aktivitetin kriminal po e sulmojnë shtetin tonë dhe po e cenojnë paqen.
Qartazi ata po i nxit e mbështet Serbia, përkatësisht regjimi autokrat atje. Fatkeqësisht, para syve të bashkësisë ndërkombëtare, Serbia po përdorë qytetarë të Kosovës për të provokuar konflikt serioz ndërkombëtar”, tha ai.
Sipas kryeministrit, tensionet janë duke u nxitur nga Servia, dhe sulme të tilla nuk do të tolerohen nga policia e Kosovës. Ai fton qytetarët nga të dyja shtetet që të shmangin provokimet. “Sulmet e këtilla zjarrvënëse dhe kriminelët që i bëjnë ato nuk do të tolerohen. Policia e Kosovës është institucion profesional që duhet respektuar nga të gjithë. U bëj thirrje qytetarëve, sidomos në veri të Ibrit, pavarësisht a janë serbë, shqiptarë, boshnjakë apo romë, që ta ruajnë qetësinë dhe të bashkëpunojnë me institucionet e Kosovës”, tha ai.
Situata në kufirin mes Kosovës dhe Serbisë po tensionohet çdo ditë e më shumë, ndërsa palët nuk tërhiqen pavarësisht thirrjeve të vazhdueshme nga ndërkombëtarët.
