“Do të ketë surpriza”, Arilena Ara zbulon detaje të reja nga “Pop Art Festival”

Arilena e konsideron “Pop Art” më shumë se një album, më shumë se një festival, por diçka të madhe që do të vazhdojë gjatë.

Në një bisedë me “Pardon my french” në Top Albania Radio, këngëtarja ndau detaje për “Pop Art Festival”.

“Do të ketë surpriza, do jetë surprizë e gjithë gjëja. Kam një energji të akumuluar prej dy vitesh, do lë zemrën dhe energjinë time atje,” u shpreh ajo për festivalin, i cili do të ketë për regjisore Vera Grabockën dhe që do të mbahet nesër (19 nëntor) në sheshin “Skënderbej”.

“PopArt është shumë më e madhe se një album, se një festival, është një brand që do të vazhdojë,” u shpreh Arilena. Ajo tha se koncerti në Tiranë “do të vazhdojë edhe në qytete të tjera. Është një festival, jo thjesht një koncert”.

Të ftuar do të jenë Gjon’s Tears, Noizy, Wendy dhe Cryjaxx.

“Sado që mundohem, nuk kam fjalë mjaftueshëm për të shprehur ndjesinë. E lumtur të ndaj me ju lajmin që albumin tim të parë e ndajnë vetëm pak ditë nga publikimi! Në ‘POP ART’ kam shprehur nëpërmjet muzikës të gjitha ngjyrat që jetojnë brenda meje,” shkroi në Instagram në fillim të korrikut, kur prezantoi për herë të parë albumin.

Ndërkohë, Arilena i është përgjigjur thashethemeve rreth pjesëmarrjes së mundshme të këngëtares Dafina Zeqiri dhe arsyes se pse përfundimisht artistja nuk do të jetë pjesë.

“Dafina ka qenë një nga të ftuarat e para, por nuk po menaxhonim dot datat.”– u shpreh ajo