Kishte kaluar oqeanin Atlantik deri në anën tjetër të botës, kishte rrezikuar jetën për- supozohet- të trafikuar së bashku me kartelet kryesore të drogës, dhe përfundoi i pajetë në një trotuar në Kolumbi, me disa vrima plumbash në trup. Ky ishte fati që, sipas hetimit paraprak të autoriteteve, pati shtetasi shqiptar Artur Tushi, i vrarë nga atentatorë më 5 tetor të kaluar në një rrugë publike të El Poblado-s, në juglindje të Medelinit.
Kur iu kontrolluan dokumentet, autoritetet zbuluan se ai kishte letërnjoftim ekuadorian dhe leje qëndrimi të përhershme në atë vend. Një muaj më parë, Interpoli kishte arrestuar në Bogota kolumbianin Samir Rosales Rodríguez, i njohur si “El Químico” (Kimiku), në zbatim të një Kodi të Kuq të kërkuar nga Prokuroria e Shqipërisë.
Drejtori i Policisë, gjenerali Carlos Fernando Triana, deklaroi më 3 shtator se i arrestuari “dyshohet se shërbente si lidhje mes mafieve shqiptare me prani në Amerikën e Jugut. Rosales koordinonte dhe mbikëqyrte logjistikën e ngarkesave të shumta me kokainë që vinin nga Paqësori kolumbian, të fshehura kryesisht në plehra organike, me destinacion përfundimtar Shqipërinë”.
Ende nuk është sqaruar nëse ka ndonjë lidhje mes atij arrestimi dhe vrasjes së Artur Tushit, të cilët, sipas të gjitha gjasave, punonin për të njëjtën organizatë klandestine, por hetuesve u ka tërhequr vëmendjen ky përkim. Për momentin, ka dalë në pah aktiviteti i vrullshëm i trafikut të drogës që shqiptarët po e drejtojnë në vendin tonë. Pse vallë kjo prani e tyre kaq e pazakontë?
Prejardhja dhe zgjerimi i kartelit
Trafikantët shqiptarë bëjnë pjesë në një mafie që quhet, në mënyrë të përgjithshme, Karteli i Ballkanit. Nuk bëhet fjalë për një organizatë të vetme të strukturuar në mënyrë hierarkike, siç ishte dikur Karteli i Medelinit, por për një koncept që përfshin një grup strukturash kriminale me origjinë nga Gadishulli Ballkanik dhe ish-Jugosllavia, ndaj quhen edhe “Jugomafia”. Disa prej tyre, në fakt, janë armiqësore me njëra-tjetrën.
Zgjerimi i tyre në Evropë filloi me Luftërat e Ballkanit (1991–2001), të cilat përfunduan me shpërbërjen e Jugosllavisë. Në eksodin e emigrantëve përmes Kontinentit të Vjetër u përzien edhe kriminelë nga Shqipëria, Bosnja, Kroacia, Maqedonia dhe Serbia, të cilët ngritën rrjete në portet dhe qytetet kryesore, gjë që e lehtësoi zgjerimin e bizneseve të këtyre karteleve. Një model të ngjashëm po ndjekin sot edhe grupe latinoamerikane, si “Treni i Aragua-s” (Venezuelë) dhe “Mara Salvatrucha” (El Salvador), që shfrytëzojnë emigracionin e bashkatdhetarëve të tyre për t’u përhapur.
Discussion about this post