Deputeti i Partisë Demokratike Ervin Salianji ka komentuar dhe njëherë dorëheqjen e Lulzim Bashës duke e konsideruar si të imponuar.
“Kemi një dorëheqje thuajse të imponuar të Bashës, nuk ishte një reagim i menjëhershëm pas 6 marsit. Dorëheqja po shoqërohet me një truk, zgjedhjet për kryetarin e ri të shtyhen pas zgjedhjeve lokale, pas një viti e disa muaj. Kjo e bën të pavlefshme dorëheqjen e tij”, tha Salianji.
I ftuar në “Dita jonë” në A2 CNN, Salianji theksoi se dhe dorëheqja e Sali Berishës nga gara për kryetar, do të sillte bashkim të demokratëve.
“Unë do të doja një dorëheqje të plotë, nuk është dorëheqja me tërheqje këmbe zvarrë. Iku dhe nuk iki, kjo është një tentativë për t’u tallur me demokratët. Duhej që kandidatët të shfaqnin platformat dhe dorëheqje të Berishës. Kjo do të sillte që PD-ja të bashkohet. Grupi i PD-së ka pasur qëndrim të qartë për dorëheqjen e Bashës. Tani jemi në kushtet që duhet të kuptojmë se çfarë do të ndodhë. Nëse është një truk do të reagojmë, pasi kjo është tallje. Interesat personale nuk mund të marrin peng një parti politike”, shtoi ai.
Discussion about this post