Dorëheqja si kryebashkiak dhe arrestimi i Erion Veliajt ishin mesazhet që dominuan protestën e kësaj të premteje para Bashkisë së Tiranës.
Përmes pankartave dhe fjalimeve nga megafoni i protestës, qytetarë, pjesëtarë të shoqërisë civile dhe përfaqësues të opozitës kërkuan dorëheqjen e Erion Veliajt si kryebashkiak i Tiranës. Po ashtu u kërkua arrestimi i tij për procedimin penal të njohur si “5D”, që disa ditë më parë çoi pas hekurave drejtorët e Veliajt dhe njëkohësisht bashkëpunëtorët e tij të ngushtë.
Të revoltuan, protestuesit e cilësuan Veliajn “hajdut” dhe shprehën bindjen se aferat korruptive të vartësve të tij janë bërë me bekimin e kryebashkiakut dhe kanë mbushur xhepat e tij. Vezët dhe mollët e lëshuara drejt fasadës së zyrës së Veliajt nuk munguan.
Protesta e thirrur nga grupimi “Aleanca për Mbrojtjen e Teatrit”, e nisur rreth orës 11:00, zgjati thuajse për 1 orë e 30 minuta dhe u zhvillua kryesisht e qetë.
Momente tensione mes protestuesve dhe policisë pati vetëm në disa momente, teksa efektivët ndaluan me forcë futjen e qytetarëve në ambientet e brendshme të bashkisë.
Pakënaqësi për veprimet e policisë shfaqën këshilltarët e opozitës në bashki, të cilët po ashtu nuk u lejuan të hyjnë brenda institucionit. Ilir Alimehmeti sqaroi se qëllimi i tyre ishte të dorëzonin në zyrën e protokollit kërkesën për mbledhje urgjente lidhur me çështjen “5 D”. Kërkesë që e dorëzoi vetëm në mbyllje të tubimit, pas shpërndarjes së protestuesve.
E teka qytetarët kërkonin para zyrës së Veliajt dorëheqjen dhe arrestimin e tij, një detaj interesant për vendndodhjen e Veliajt u dha nga ish-deputeti demokrat Belind Këlliçi. Nga megafoni i protestës, ku lajmëroi se protestat si kjo e sotmja do kthehen në periodike deri në largimin e Veliajt nga posti i kryebashkiakut, ai zbuloi se kreu i Bashkisë Tiranë kishte shkuar për drejtë “me anëtarët e tjerë të korruptuar të stafit”.
“Ndërkohë që ne jemi këtu në protestë, ndërkohë që anëtarët e këshillit bashkiak kërkojnë informacione për vjedhjet që kanë ndodhur, ndërkohë që jemi në ditë pune dhe anëtarët e këshillit bashkiak kanë gjithë të drejtën ligjore për t’u future në Bashkinë e Tiranës, a e dini ku po shkon Erion Veliaj? Po shkon të drekojë me pjesën tjetër të bandës së ‘5D’-së në restorantin e një banditi tjetër, administratorit të njësisë Farkë, Narit të Lundrës që nuk ka lënë tokë të fshatarëve e qytetarëve pa grabitur”, u shpreh Këlliçi.
Discussion about this post