Tenderi i dyshimtë i ndërtimit të ujësjellësit nga bashkia e Kuçovës, në kanionin e Sinecit, i cili ndodhet pranë fshatit Lumas, është shfryrë nga Prokuroria e Posaçme SPAK. Prokurori ka vendosur të shpallë mos-kompetencën e çështjes penale, ku të kallëzuar ishin, kryetari i Bashkisë Kuçovë, Kreshnik Hajdari, ish-ministri i Turizmit, Blendi Klosi, biznesmeni i kompanisë së ndërtimit “Salillari”, Pëllumb Salillari si dhe zyrtarë të tjerë të Inspektoriatit të Mbrojtjes së Territorit në Kuçovë.
Për një periudhë gati 1-vjeçare, prokurori i SPAK-ut dhe oficerët e BKH-së, nuk ishin në gjendje të provonin akuzën e “Shpërdorimit të detyrës”, “Pabarazisë në tendera” dhe “Korrupsionit”. Nisur nga kjo situatë, SPAK ka vendosur pak kohë më parë të shpallë mos-kompetencën dhe t’ia kalojë çështjen për hetime të mëtejshme Prokurorisë së Beratit.
Prokurori i kësaj Prokurorie, Adnand Hoxha, ka nisur tashmë hetimet për veprën penale të “Ndërtimit të paligjshëm” në zonën e Kanionit të Sinecit, duke shmangur totalisht nga përgjegjësia penale, zyrtarët e bashkisë së Kuçovës. Kallëzimi ndaj funksionarëve shtetërorë në Kuçovë, është depozituar nga 123 banorë të fshatit Lumas në Kuçovë,të cilët kanë kundërshtuar për disa muaj kryerjen e punimeve në terren.
Njëherësh 123 banorët e fshatit Lumas në Kuçovë, i kanë kërkuar gjykatës Administrative në Vlorë, që të ndalojë punimet në një zonë të mbrojtur dhe shpallur si Monument Natyror. Sipas banorëve të zonës, kryetari i Bashkisë Kuçovë, Kreshnik Hajdari, ka miratuar lejë ndërtimi të një ujësjellësi, në Kanionin e Lumit Sinec, që sipas tyre është zonë e mbrojtur dhe shpallur monument Natyre me vendimin e Këshillit të Ministrave të vitit 2002, për shpalljen si zonë e mbrojtur dhe monument natyre.
Në këtë zonë është dhe një burim uji, i cili është pjesë e këtij monumenti natyror.
“…bashkinë Kuçovë nëpërmjet kryetarit të bashkisë Kreshnik Hajdari, ka nxjerrë një leje ndërtimi dhe pikërisht leja Infrastrukture e datës Tetor 2020, e cila do të ndërtohet në Kanionin e Lumit Sinec një ujësjellës,e cila është zonë e Mbrojtur dhe shpallur Monument Natyre…”-thuhet në kallëzimin e banorëve.
Prej mëse dy muajsh banorët e kësaj zone protestuan kundër ndërtimit të ujësjellësit, me argumentin se tenderi i bashkisë së Kuçovës me vlerë 361 milion lekë të reja, është një aferë korruptive e kryebashkiakut Hajdari dhe kompanisë “Salillari”.
Discussion about this post