Drejtohej nga 2 shqiptarë, shkatërrohet organizata e drogës në Spanjë

Një organizatë kriminale e kultivimit dhe trafikut të drogës është shkatërruar nga Policia spanjolle në provincën e Alicante.

Organizata drejtohej nga xhaxhai dhe nipi, të dy shqiptarë, ndërsa Policia arrestoi 9 persona. Të arrestuarit janë persona me kombësi shqiptare, italiane dhe greke.

Hetimet për veprimtarinë e organizatës kanë nisur në dhjetor të 2022, kohë kur  Garda Civile mori informacione se në provincën Alicante, në mjedise të mbyllura, kishte nisur kultivimi i bimëve narkotike.

Menjëherë Postat kryesore të Gardës Civile të Ibit dhe Alteas, bashkërisht dhe për të konfirmuar informacionin e marrë, nisën operacionin Florenpapa-Scouts.

Tre plantacione marijuane ishin ngritur në banesa, në zonat e Alteas, Castalla dhe Alicante, ku organizata kërkonte të kalonte pa u vënë re. Pas vëzhgimeve të kujdesshme, agjentët kanë arritur të identifikojnë anëtarët e grupit kriminal dhe të zbardhin rolet dhe funksionet e tyre.

Në krye të kësaj bande ishin dy shqiptarë për të cilët kishte edhe një urdhër arresti ndërkombëtar nga Itali.

Ndërkaq gjatë katër kontrolleve të njëkohshme që u kryen në Alicante, Altea dhe Castalla, organizata kriminale u çmontua.

U arrestuan nëntë burra me kombësi shqiptare, greke dhe italiane, të moshës nga 21 deri në 58 vjeç . Gjithashtu, janë sekuestruar 2 armë zjarri, 1592 bimë marihuanë, 1005 euro para të gatshme, material për kultivim dhe 2 automjete të tipit të lartë .

Në banesa, kriminelët për t’i bërë plantacionet më efikase dhe fitimprurëse, kishin bërë lidhje të paligjshme në rrjetin elektrik, duke i shkaktuar një dëm ekonomik prej 196.782 euro kompanive elektrike.

Në momentin e arrestimit, njëri prej drejtuesve tentoi të ikte nga një ballkon, por më në fund u ndalua nga agjentët në tarracën e një shtëpie aty pranë. Krimet që u janë ngarkuar të arrestuarve, sipas shkallës së pjesëmarrjes, përfshijnë trafik dhe kultivim droge, armëmbajtje pa leje, mashtrim me energjinë elektrike, pastrim parash dhe përkatësi në një organizatë kriminale.

Të arrestuarit së bashku me provat e marra i janë vënë në dispozicion Gjykatës Hetimore Nr.2 Ibi , e cila ka urdhëruar burgosjen e 8 prej anëtarëve të bandës, mes të cilëve edhe dy drejtuesit.