Tre drejtorët e Erion Veliajt, Redi Molla, Taulant Tushe dhe Mariglen Qato, do të vijojnë të qëndrojnë në qeli deri në përfundim të hetimeve ndaj tyre.
Gjykata e Posaçme ka rrëzuar sërish kërkesën e tyre për zbutje të masës së sigurisë.
Tushe, Molla dhe Qato u arrestuan në muajin mars të këtij viti me urdhër të Prokurorisë së Posaçme Antikorrupsion, në kuadër të hetimeve për dosjen ‘5D’.
Tre ish drejtorët u lanë në masën ‘arrest në burg’, ndërsa pesë persona të tjerë në masën ‘detyrim paraqitje’, konkretisht Enton Punavija, Julian Zanaj, Albano Janku, Nestor Muhamellari, Deborah Keçi dhe Englatina Zere.
Hetimi për këtë çështje nisi në vitin 2023, për dy vepra penale “Shpërdorim detyre” dhe “shkelje e barazisë në tendera”.
Sipas hetimeve, dy drejtorët e Erion Veliajt, Redi Molla dhe Mariglen Qato, si drejtues të Ujësjellësit, i kanë dhënë tendera një kompanie që “de facto” ishte në pronësi të tyre. Kontrata të tjera kanë marrë dhe nga vetë institucioni i drejtuar nga Erion Veliaj, si dhe ente të tjera në varësi të Bashkisë Tiranë, duke përdorur pushtetin e tyre si të zgjedhurit e kryebashkiakut.
Interesant është një komunikim konfidencial i një punonjëseje të firmës së Mollës e Qatos të administruar në dosjen hetimore, që sugjeron se bosi i vërtetë i kompanisë “5 D” që thithte paratë e taksapaguesve është vetë shefi i bashkisë, Erion Veliaj.
Discussion about this post