Dritan Agolli e ka kthyer Fondin Shqiptar të Zhvillimit në një institucion që financon dëshirat për korrupsion. Sidomos kur bën pakt me kryebashkiakët fiton “xhekpot”. Këtë herë bashkëpunimi është me kreun e Bashkisë Korçë, Sotiraq Filo, për të vazhduar planin e tij të nisur qysh para 3 vitesh. Po flasim për tenderin me objekt “Inkubator i Biznesit në Mikpritje dhe Turizëm në Korçë, LOT 3”.
Sqarojmë se bëhet fjala për një godinë në qendër të qytetit, e cila më parë ka qenë materniteti i Korçës, por para 3 vitesh Bashkia e mori në pronësi të saj. U derdhën para për rikonstruksionin e godinë, duke e kthyer në “Inkubator të Biznesit në Mikpritje dhe Turizëm në Korçë”.
Kjo është një zyrë pritje për ata që kanë ide biznesi dhe kërkojnë ndihmë nga bashkia.
Pra një zyrë idesh, ku supozohet që bashkia t’iu ofrojë asete bizneseve të reja për të zhvilluar start up-in e tyre.
Ndërsa tani po planifikohet të shpenzohen 300 milionë lekë për ndërhyrje tjetër në godinë.
Sipas preventivit, të dorëzuar në dosjen e tenderit, do të bëhen ndërhyrje në disa hapësira ku pritet të hapen bare, hotele, restorant dhe një atelie. Me pak fjalë, është marrë modeli “Piramida” në Tiranë, “stadiumi me kullë” në Tiranë. Edhe në rastin e Korçës po tregohet se qëllimi parësor i marrjes së godinës së Maternitetit ka qenë hapja e kafeneve.
Tenderi i manipuluar
Manipulimi i projektit është i finalizuar me procedurat në shkelje gjatë zhvillimit të tenderit. Gara është shpallur më datë 15 tetor 2024 dhe ka qëndruar e hapur për një muaj. Edhe pse ishte një projekt me rëndësi të lartë, vetëm firma QuantX IT Solutions shpk dorëzoi një ofertë me vlerë 263 milionë lekë. Kështu ndodh, kompanitë nuk afrohen në tendera, ku dihet qysh më parë se kush do të fitojë.
Pra, situata ishte e tillë me mungesë konkurrence, ofertë e shtrenjtë dhe fond limit i llogaritur mbi shpenzime të paqarta.
Në këto kushte, procedura duhej anuluar, pasi kështu tregohet kujdes për paratë e taksapaguesve.
Por, kur në lojë janë përfshirë Agolli dhe Filo, ligji shkelet me të dyja këmbët dhe askush nuk i prek në kallo.
Prandaj me kënaqësinë e përfitimit, më datë 25 nëntor 2024 është shpallur fitues operatori QuantX IT Solutions shpk.
Open Data Albania e ka vlerësuar tenderin me “Flamur të kuq”, që akordohet për treguar riskun e korrupsionit.
Llogaritë e hapura në SPAK
Ndërkohë që merrej me këtë tender, Dritan Agolli është paraqitur në SPAK. Kujtojmë se në 12 nëntor 2024, Dritan Agolli, drejtori i Fondit Shqiptar të Zhvillimit ishte në SPAK. Bëhet fjalë për një tender me vlerë 500 mijë Dollarë të FSHZH-s për një menu të projektit “100 fshatrat”.
Tenderi u fitua nga dy shefa kuzhine, një nga të cilët ishte i punësuar në një restorant në pronësi të djalit të Agollit.
Po ashtu, Dritan Agolli është pronar i një kompanie e quajtur ‘Magnum Opus’ group me objekt studime në nivel strategjik, menaxherial, operacional, analiza, vrojtime, sondazhe, konsulencë, shërbime administrative etj.
Kompania rezulton që ka marrë para publike. Agolli ka siguruar para publike përmes nënkontraktimeve dhe kompaninë që u ka dhënë tendera publik.
Kemi një marrëdhënie që kreu i FSHZH ka kryer me kompani private, me të cilët i ka lidhur interesi.
Një vit pasi Agolli është emëruar në krye të FSHZH, i biri i tij deklaron se gjyshi i ka dhuruar një shtëpi me sipërfaqe gati 1550 metra/katror, ndërsa Agolli ka deklaruar në institucionin kundër pastrimit të parave se ka shitur një apartament 360 mijë euro, ndërkohë që vlera e tij ka qenë gjysmë për gjysmë në kohën e blerjes.
Me këtë lëvizje ka justifikuar blerjet e apartamenteve dhe garazheve ku ai jeton dhe i ka pronë të tij. Bëhet fjalë edhe për një shumë që do t’ia kalonte biznesit të djalit të tij, 400 mijë euro. Sipas një reagimi nga Agolli kjo procedurë është pezulluar dhe kjo ka mbetur në tentativë.
Gjithashtu, kanë dalë dokumente ku nga një subjekt me emrin ‘Fusha’, Agolli ka marrë një tokë fare pranë qendrës tregtare TEG.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post