Nexhmedin Danaj, pronari i “Vlora Cable”, është arrestuar në Dubai, pasi ishte shpallur në kërkim në kuadër të hetimeve për pastrim parash dhe trafik droge.
Danaj dyshohet se ka pasur një rol në lëvizjen dhe pastrimin e parave që dyshohet se rridhnin nga trafiku i kokainës. Sipas të dhënave të bëra publike gjatë hetimit, paratë dyshohet se janë lëvizur edhe drejt Dubait përmes kompanisë “General Trading LLC”, me seli në Emiratet e Bashkuara Arabe.
Emri i Nexhmedin Danajt doli në kuadër të operacionit ndërkombëtar “Ura”, të zhvilluar nga SPAK dhe autoritetet italiane kundër grupeve të dyshuara për trafik ndërkombëtar droge dhe pastrim parash.
Në kuadër të këtij operacioni, “Vlora Cable”, në pronësi të Danajt, si dhe biznesi “Dubai Inn”, u vendosën nën sekuestro. SPAK njoftoi se hetimet, të zhvilluara gjatë viteve 2020–2025, dokumentuan 40 episode të trafikut të narkotikëve, përfshirë raste të trafikimit të kokainës dhe heroinës.
Nga ana tjetër, lidhja e tij familjare me Algerta Fejzullën – që më herët ka mbajtur poste drejtuese në administratën publike – hedh hijet e para të dyshimeve mbi ndikimin e rrjeteve politike dhe klienteliste në mbështetjen ose mbrojtjen e aktivitetit kriminal.
Në total, operacioni çoi në 52 masa sigurie në Shqipëri dhe Itali, ndërsa u sekuestruan pasuri, kompani, automjete dhe shuma parash që dyshohet se kanë lidhje me aktivitetin kriminal.
Hetimet ndaj Danajt vijojnë, ndërsa arrestimi i tij në Dubai pritet të pasohet nga procedurat për ekstradimin dhe vënien e tij në dispozicion të drejtësisë.
gijotina.com/
Discussion about this post