Deputeti Agron Duka, kryetar i PAA, tha në studion e Report Tv, se hapja e listave të kandidatëve, do të bëjë të mundur që në Parlament të shkojnë ata që marrin më shumë vota.
Duka tha se ky sistem që aplikohet është i padrejtë, pasi një parti mund të marrë 7-8 mijë vota në një qark dhe nuk merr asnjë mandat deputeti.
“Kemi rastin e LSI që mori 104 mijë vota dhe u përkthyen në 4 mandate deputetësh”, tha Duka.
Sipas tij, ndryshimet që u bënë në 2020 i dhanë dërmën sistemit, u tha për lista të hapura dhe na rezultoi një mashtrim, nuk u lejuan koalicionet klasike.
“Ky lloj sistemi copëzon votat dhe nuk favorizon jo vetëm partitë e vogla, por në përgjithësi opozitën”, tha Duka.
Kreu i PAA-së tha se ndoshta ndryshimet e propozuara për Kodin Zgjedhor mund të sjellin një bashkim të opozitës, pavarësisht ndasive që kanë sot.
“Duhet një proporcional kombëtar me lista të hapura ose proporcional në zona më të mëdha, pasi ky sistem që kemi sot, nuk favorizon asnjë nga forcat e reja politike. Një parti e re mund të marrë në Tiranë 8 mijë vota dhe nuk merr asnjë mandat, pasi duhen 12 apo 13 mijë vota”, tha Duka.
Sipas tij, Shqipëria sot mund të jetë ndër të paktat vende që kanë probleme me zgjedhjet. “Shikoni Kosovën, nuk ka probleme me zgjedhjet, pranohet rezultati, ndërsa në Shqipëri nisin akuzat ti më vodhe, ai më vodhi dhe këtu pastaj nuk merret vesh kush është hajduti”, tha Duka.
Discussion about this post