Nga Klodian Tomorri- Rreth 3 milionë dollarë të ardhura më shumëse sa plani ka arketuar koncesionari i rrugës Durrës-Kukës nga tarifa e kalimit vitin e kaluar. Ky është fitim mbi fitimin. Dhe kjo është ajo që raporton vet kompania se fitimi real nuk dihet sa është aty. Por nejse.
Meqenëse aty është fituar para mbi skenarët edhe më optimistë, sipas kontratës koncesionare 60 për qind të tejkalimit të fitimit e merr shteti. Me pak fjalë, shteti vitin e kaluar mori 1.5 milionë dollarë nga rruga Durrës-Kukës.
Për çfarë i duhet shtetit të marrë para nga Durrës-Kukës? Meqenëse aty fitohet aq shumë nga tarifa e kalimit, pse nuk ulet tarifa? Sikur vetëm tepricën e fitimit t’ja u kthenin mbrapsht qytetarëve, tarifa do të ulej të pakten me 1 euro.
Normalisht çdo lek që qeveria do të ulte në tarifën e kalimit të rrugës kthehet disa fish përmes zgjerimit të aktivitetit ekonomik, turizem dhe tregti. Sot shqiptarët e Kosovës, përvecse konsumatorët më të mëdhenj të turizmit, janë faktorë kyç edhe në parandalimin e fluskës së ndërtimit. A do kishte ndihmë më të madhe për ekonominë dhe politikën me efikase se kjo? Por askujt nuk i shkon në mendje të lehtësojë qytetarët nga tarifa sepse kanë axhendë tjetër.
Rruga Durrës-Kukës është një nga asetet më strategjike të ekonomisë shqiptare. Eshtë ndër të paktat vepra publike qe e ka kthyer me disa fish investimin e saj, me gjithë akuzat për korrupsion dhe fryrjen e kostove të ndërtimit.
Sot një pjesë e mirë, ndoshta më e madhja, e aktivitetit turistik në Shqipëri, gjenerohet drejtpërdrejtë nga shqiptarët e Kosovës. Shkëmbimet tregtare me rajonin u rritën me here fale rrugës Durrës-Kukës, e cila rriti njëkohësisht edhe rëndesinë strategjike të Portit të Durrësit.
Çfarë bëri qeveria shqiptare? Filloi sabotimin. Kryeeksperti i IFC-se që udhëhoqi procesin e koncesionit dhe vënies së traut në Durrës-Kukës ishte serb. Tarifa 5 euro u sugjerua po nga IFC-ja.
Por prape, rruga ishte bekim shume i madh. Edhe me haraçin e traut sillte përfitime për ekonominë. Kështu që duhej shkatërruar edhe Porti i Durresit. U mor vendimi për t’i venë kazmën edhe Portit.
Kështu që mbyllim rrugën, por hapim Ballkanin. Shqyejmë kufijtë, por shkaterrojmë Portin. Bëjmë mbledhje të përbashkëta qeverie me Kosovën, por i vënë kosovarëve taksën më të rëndë të kalimit për kilometër në Europë.
Pastaj, kur fitimet nga taksa janë më të larta edhe se sa skenarët më optimistë, vazhdojmë e taksojmë fort. Madje japim edhe miliona euro nga buxheti i shtetit, gjoja për përfundimin e rrugës. Edhe Vuçiçi po të ishte kryeministër i Shqipërisë nuk do të kishte patur guximin për të vënë taksë 5 euro tek rruga Durrës-Kukës.
Discussion about this post