Ministri i Jashtëm i Shqipërisë, Igli Hasani është nisur sot drejt Kosovës, ku do të marrë pjesë në homazhet, në nder të policit Afrim Binjaku, i vrarë një ditë më parë nga forcat serbe.
Pas vrasjes së efektivit të policisë së Kosovës, i menjëhershëm ishte reagimi i ministrit të Jashtëm i Shqipërisë, Igli Hasani, i cili dënoi sulmin me armë ndaj Policisë së Kosovës në veri.
Në një reagim në rrjetet sociale, ministri Hasani thotë se vrasja e policit të Kosovës kërcënon stabilitetin e rajonit dhe se autorët duhet të përballen me ligjin.
“Dënojmë me ashpërsi sulmin me armë ndaj Policisë dhe shtetit të Kosovës. Ngushëllimet tona për familjen e oficerit të Policisë që humbi jetën në krye të detyrës dhe shërim të shpejtë efektivit të plagosur. Akti i sotëm kriminal është kërcënim për sigurinë e stabilitetin e rajonit tonë dhe autorët duhet të përballen sa më parë me drejtësinë”.
Edhe ministri i Brendshëm Taulant Balla është nisur drejt Prishtinës, ku do të marrë pjesë në homazhet për nder të Rreshterit Afrim Bunjaku, i cili u vra nga terroristë serbë gjatë sulmit në veri të Kosovës.
Sot Kosova ka shpallur ditë zie, teksa do të përcillet në banesën e fundit dhe efektivi i rënë në krye të detyrës.
Taulant Balla ka zhvilluar një bisedë telefonike me homologun e tij, Xhelal Sveçla ditën e djeshme ku i ka shprehur ngushëllimet për zyrtarin e policisë që ka humbur jetën dhe ka uruar shërim të shpejtë të plagosurve.
Discussion about this post