Bllokimi me shumë bujë i 863 mijë e 100 eurove nga policia e Elbasanit, ku brenda në makinën “Range-Rover”, u sekuestruan dhe tre patenta ludrimi të mjeteve detare, që i përkisnin ish-ministrit Saimir Tahiri dhe bashkëshortes së tij, Fatlinda Tahiri, është mbyllur në gjykatën e Elbasanit. Gjykata ka vendosur që kjo shumë parash, që u sekuestruan t’i kthehet Lefter Sotës dhe djalit të tij, Ores Sota.
Kanë kaluar më shumë se dy vite nga ky sekuestrim, dosja është mbyllur me argumentin se paratë ishin të deklaruara pasi rridhnin si rezultat i veprimtarisë tregtare të kompanisë “IKONA”, Sh.p.k.. Nisur nga kjo situatë prokurorja e Elbasanit, Erida Kokonozi ka proceduar me një kërkesë në gjykatë, duke kërkuar pushimin e veprës penale të “Pastrimit të produkteve të veprës penale ose veprimtarisë kriminale”. Kjo kërkesë është miratuar dhe nga gjyqtarja Pajtime Fetahu, e cila konfirmoi dhe kthimin e parave tek dy të pandehurit Sota.
Në dosjen e prokurorisë thuhet se, Lefter Sota, sipas vërtetimi të lëshuar nga Banka Popullore në datën 15 gusht 2007 ka shitur 433 aksione që zotëronte nga kapitali aksioner me çmim 370.000 lek aksionin me një vlerë totale prej 160.210.000 lekë. Konvertuar në Euro me kursin e ditës 122.6 lekë shuma në euro që është arkëtuar rezulton 1.176.092.98 euro. Madje ndër të tjera shtohet se ai ka paguar tatimin mbi fitimin nga shitja e aksioneve këtë shumë që ka tërhequr nga banka.
Si përfundim, Orest Sota, është dënuar nga gjykata e Elbasanit me 240 orë punë të detyrueshme pranë bashkisë së Tiranës. Kujtojmë se nga kjo ngjarje kanë filluar hetimet edhe për ish-ministrin Saimir Tahiri, pasi në 1 nëntor të vitit 2017 gjatë arrestimit, Orest Sotës iu gjetën në makinë 863 mijë euro dhe patentat e ish-ministrit të Brendshëm, Saimir Tahiri dhe bashkëshortes së tij.
