Rezultatet në fushën e lojës nuk mjaftojnë që Carlo Ancelotti të bëjë një jetë të qetë në Spanjë.
Prokurorët e shtetit spanjoll kanë akuzuar trajnerin e Real Madridit, për mashtrim të dyshuar tatimor, duke pretenduar se ai ka fshehur një pjesë të të ardhurave të tij gjatë periudhës 2014-2015 kur ishte trajner i Realit.
Prokurorët thanë në një deklaratë të mërkurën se tekniku po akuzohet për dy llogari të mashtrimit tatimor duke shtuar se dënimi mund të shkonte deri në katër vjet e nëntë muaj burg.
Dyshohet se italiani ka fshehur 1 milionë euro gjatë kohës 2014-2015.
Prokurorët pretendojnë se gjatë asaj periudhe italiani ka deklaruar vetëm të ardhurat që ka marrë nga Real Madrid dhe nuk ka deklaruar të ardhura nga të drejtat e imazhit.
Vetë Ancelotti nuk ka komentuar ende në lidhje me hetimet e prokurorisë spanjolle, teksa gjasat më të mëdha janë që trajneri të arrijë një marrëveshje me autoritetet tatimore, në mënyrë që të paguajë një gjobë të majme dhe të mund të vazhdojë rregullisht aktivitetin.
64-vjeçari Ancelotti ishte trajner i Realit nga periudha 2013-2015 përpara se t’i bashkohej klubit në vitin 2021.
Discussion about this post